ICBM Gospel: Indy Revival Group to CCBC, IL

Nizan October 13,2013 ah Chicago Chin Baptist Church(CCBC) ah Indianapolis in ICBM Revival team a kal mi hna aiawh in thawng kan thanh ve hna. Indianapolis ah hin CBCUSA chungtel Khrihfabu 6 kan um i pa hnih hna cu an i relrem thiam deuh lo caah Khrihfabu pali (ICBC,CEBC,ZCC le CCC) chungin mino 14 le an upa Simon pa he tiah CCBC Khrihfabu kan va leeng hna. An team leader Mai Hlawn Za Iang (Aahlawng) nih a hruai hna i an i nuam ngaingai. An lung aa rual tuk i an caan hmang mi hna zong lung a hmui tuk hringhran. Pathian Thiang Thlarau nih a um pi hna i vancung mi ko khi an lo ko. ICBM Revival group ca i an i pumpeknak zoh tikah uar an um tuk. Cheukhat cu voi 6 a vak cang mi zong an um i voi 5 voi 4 voi 3 ti hna an si dih. A voikhatnak a vak mi cu keimah long ka si i an hmai ka khap pah hna lo.

ICBM Revival vahnak caah tuanvo ngeitu Pastor Ronald Charles cungah ka lung a tling pah ti lo. ICBM Director Rev.Dr. Cung Lian Hup nih ICBM cu a UN min asi i original min takcu CCOC ati bantuk in kan fa le hi CCOC palai Revival team a vak tawn mi bak kha an si ve ko, action song an piah lo mi long asi. An i biatak ning hi vancungmi ko an lo ka ti cang kha. Kan lennak hna Khrihfabu zong nih CCOC bantuk in an rak kan cohlang ve, lungthawh thanuam tuk in an kan dong i an kan kilkawi i an kan conghram ve. Kan dihlak minung 15 kan si i phu nga in kan i then i inn kip thlacam kan vah cu CCOC a voikhatnak bak kha kan si ko. An hlaremh that le an solo that le ngaihnuam cu an mak lawlaw. Kan team lead (Aahlawng)nih Zarhpi chun pumh ah chairperson a kan tuan piak i Khrihfabu a ningpi in a cawl ter. Mai Ca Tin Rem  (Tin Tin) nih ICBM riantuannak kong presentation a kan tuah piak i lung a hmui tuk. Amah pumpak in kawlram i nah-tah-lah riantuannak kong a tonmi a kan share chap mi nih a fianter chin i lung a thawh ter khun i mi hnarno hna a tam ter. Pumhnak voihnih kan ngei kho i kan i nuam taktak ko. A tu tan kan team cu ka hmai an ka hngalter i ka hna an ka ngamter i kaa lunghmui taktak ko. “Excellent Team” bak an si ko.

Kan lennak Khrihfabu hi Chicago Chin Baptist Church (CCBC) an si i Pastor an ngeih lonak in kumkhat leng an si cang. Church chairman ah Pu San Aung (Solomon pa) a si i a riantuan ti hawi Khrihfabu upa he Khrihfabu an zohkhenh ning cu uar an um tuk. Zohchunh awktlak taktak an si ko. Khrihfabu an zohkhenh ningcang kan zoh tik hna ah thazang tamtuk an kan pek. Chungtel  pawl nawl an ngeih ning le Chairman le upa pawl an lung aa rual ning le an i pumpek ning zoh tikah Jesuh mui an cuang dih.

CBCUSA chungtel an si lo nain an lungput cu CBCUSA ah an um ko. An kan ti mi cu ICBM nan ti lengmang mi CCOC riantuannak ah cun kan i tel peng ve ko lai an kan ti mi nih a kan lawmhter ngai. Bawipa nih thluachuahnak pe ko hna seh. Kan program  adih hnu ah CCBC mino nih Chicago downtown an rak kan hel pi i annih zong inn ah an tlung i kannih zong kan khua ah kan rak kir i Pathian lamhruainak in dam tein in Zarhpini zan ah kan rak phan than ve.

Bawipa nih CBCUSA le aa hmaitlak mi ICBM riantuannak cu thluachuahnak pe chin ko seh………..Amen.
ICBM Revival team to CCBC aiawhtu,
Peter Darkham Thangngan (Simon pa)