Adoniram le Ann Judson Mission Riantuannak

Siangbawi Adoniram Judson & Ann Judson Hna Theihtthannak
 

American Baptist Missionary nuva Rev. Adoniram & Ann Judson cu July 13, 1813 ni ah Rangoon an phan. Felix Carey (siangbawi minthang Rev. William Carey fapa)  inn ah an tlung. Judson hi 1788 kum ah Malden, Massachusetts ah a chuak. A pa cu Congregational Church minister a si. A nu cu nuncan ziaza tthate a si. Judson cu a pa nih cathiam seh ti a duh i Plymouth khua ah sianginn a kai ter. Kum 12 a si ah Greek holh a thiam cang. Kum 16 a si in Brown University ah a kai. Ca aa zuam. A thiam bik a si.

Ca a cawn lio ah Pathian a zum lo mi hawikom a ngei. Cu pa ruahnak nih a khuh ve. Mah duh in nun kha a ruat cang. Mah nuamhnak caah khual a tlawng. Khualriahbuk ah a riak. A riahnak khaan kam ah a riak mi pa cu thih bawh in a hrum ai. A thaizing ah a thi ti thawng a theih. Brown University ah a kai ve mi amah kum zat mino te a si. Cu nih thil tampi a ruah ter. Bible sianginn kai aa tiim. Andover, Congregational School nih awl tein luhnak nawl an pe lo. Cawnnak sang kai kho ding a si rih lo; Pathian rianttuan cu a duh tak hnga hme maw; Khrihfa ka si tiah a ti kho rih lai lo, an ti. Nain, a fimthiamnak kha an hngalh caah an luh tthan. Thla thum chung kha Khrih ah a nunnak pek aa zuam hnu ah December 1808 ah Jesuh cu a Khamhtu ah a pom. Thla ruk hnu baak June 1809 ah, a chan chung ah a voikhatnak Khrihfa chungtel sinak kha a pa rianttuannak Congregational Church ah a lak. Khrih chungah nunnak thar in a nung.

A hawipa nih carel ding kha a pek. British East India Company ah chaplain a ttuanmi Rev. Claude Buchanan nih a ttial mi "Nichuah Arfi (The Star of the East)" timi a rel ah Pathian auhnak kha a thinlung ah a lang. Kawlram ah Gospel he rianttuannak timi "Embassy to Ava" kha a rel tthan. Khrih nih "Vawlei khuazakip ah Thawngttha Chim dingin Fialnak" kha a theih. India ah kal ding in auh ka si tiin aa ruat. India khawh in khoika kal ding kha cu a fiang lo. February 1810 ah Nichuah lei mi khamhnak caah thawngttha chim ah kal ding ah biakhiahnak a tuah. June 1810 ah a Bible sianginn kai a liim cangka in rianttuan ding ah sawmtu tampi a ngei. Brown University zong nih siangcachim ah an sawm. A nu nih "a runinn he a hlat lo, a ttha" a ti. Adoniram nih cun "Boston hrawng ah cun ka um lai lo. Lam hla deuh ah kal a hau" a ti ve. 

Adoniram Judson cu Nancy (hnu ah Ann tiah auh) Hasseltine he dawtnak le duhnak he February 6, 1813 ni ah Tabernacle Congregational Church, Salem, Massachusetts, ah thlarau chitithuhnak (ordination) a ngeih hnu ah tthit-umhnak an tuah colh. Adoniram le Ann nih an duhbik mi Khrih thawngttha cu chim ding in February 18, 1912 ni ah Salem, Massachusetts, in Calcutta, India lei ah kal ding in Caravan tilawng in an pok.

Rili cung i tilawng in an kal lio ah Adoniram Judson cu Biakam Thar chungah tipil-innak kong kha a rel. India an phak tikah Adoniram le Ann cu zumhnak ngeih hnu ah tipil in ding (believer's baptism) kha an pom. Rev. William Ward nih Lal Bazaar Chapel, Calcutta ah September 6, 1812 ni ah tipilnak a pek hna. A dang siangbawi pakhat Luther Rice zong November 1, 1812 ni ah tipilnak a ing ve. Congregational Church nih an thlah hna nain Baptist ah an cang tthan. 

Hi lio hi America le British pawl an i doh lio a si caah, the British East India Company nih India ram ah mission rianttuan ding kha an sianh hna lo. Adoniram le Ann cu June 22, 1813 ni ah Georgiana tilawng in Madras in Rangoon lei kal ding ah an i thawh. July 13, 1813 (Nihnihni) ah Rangoon khua cu an phan. Judson le Ann cu Kawl ca le nuphung hna kha an cawng colh. Judson nih January 1816 in Kawl holh in Baibal Biakam Thar leh hram a thok. August 1816 in Jesuh Khrih khamhnak kong kha catlap in a ttial i phawt hram a thok.

1817 kum dongh lei ahcun Kawl holh in phung a chim kho cang. Kawl phungki hna nawl kha aa cawn i phungchimnak caah April 1819 ah an inn hmai ah thlamte (zayat) kha a sak. Ann zong nih a nu hawi hna kha hi thlamte ah cun a cawnpiak ve tawn hna. April 4, 1819 Zarhpini ah an innpa minung 30 tluk kha an sawm hna i a hmasabik pumhnak kha an tuahpi hna. Cu ka thlamte ahcun Maung Naw zong cu Khrih khamhnak thawngttha thei in zumtu hrintthan mi a si.  

Adoniram le Ann cu Pathian thawngttha ruangah an temtuarning a fak tuk. Avoikhatnak Kawl le Mirang Ral ruangah siangbawi te cu Mirang pawl mingiatu ah an rel hna. Ava khua ah Rev. Judson le Dr. Price cu June 8, 1824 ni ah an tlaih hna i Ava thonginn ah an khumh hna. Ann nih cun an luatnak ding caah aa zuam len nain a tlam tling lo. Maung Ing a hei thlah i a va zoh ter hna. Rev. Judson le Mirang dang vialte cu minung pathum phir in thirhri in an hren hna kha a va hmuh hna.  

Kawl siangpahrang nih Arakan ram ah General Bandoola cu raltuk a tthawng ti a theih caah Ava khua ah a auh. Ann nih cun Bandoola cu Adoniram te kha luat ter ding in a nawl. A ngah lo nain, thawnginn chungah Adoniram lawng um kho ding in rua in innkhan dang te sak piak nak nawl a pek. Ni khat ah suimilam pahnih/thum lennak caan kha a pek. Ann nih chantling chungah a leh lio mi Biakam Thar cauk kha a khumh i Judson cu a kuat.  

General Bandoola cu a thi ti thawng a hung thang. A chawngtu Paganwun nih thawngtla vialte kha Ava in Aungpinle ah a tthial hna. Nilin thetse lak ah an kero in kal ter hna kaw, Judson ke vun vialte cu a hawk i thi a chuak dih. A chantling cu thawngcawng nih lam thlang ah an hlonh piak. Maung Ing nih an umnak thawnginn a hawlnak ah a chantling cu a va hmuh. A Bible zong cu tlau lo tein a va char tthan. "Bawipa bia cu a tlau kho lo." Kawl pawl cu ral a sung ding in an um cang. Kawl siangpahrang le Mirang pawl cu an i chawn. Judson nih holh a leh piak hna. February 24, 1826 ni ah Yandabo biakamhnak cu min an tthut.  

Thawng in a chuah hnu ah Adoniram le Ann cu Rangoon lei ah an tlung tthan. Kum hnih le thla thum chung an hngah ti lo mi mission inn ah an um tthan. Judson hi kum khat le thla sarih chung thong a tlaak kar ah Ann nih fanu te Maria Elizabeth kha January 26, 1825 ni ah a ngeih. Hi ral chung ah Burma ram zumtu hmasabik U Naw le zumtu thar cheukhat hna cu an rak thi cang. Judson nih Kawl khuapi ah khrihfabu ser ding in aa timh mi cu ral ruangah a hlawh tling lo. 

Adoniram le a innchungkhar cu Tennisarem khuapi thar Amherst ah mirang uknak tang ah um ding in an i tthial i July 2, 1826 ni ah an phan. Kawl bawi nih cun Judson cu Ava khua ah an auh than i a um lo kar ah a dawtbikmi le thawngttha chimpi hawi Ann Judson cu kum 37 a si lio ah kumno tein October 24, 1826 ni ah a thih thawng a theih. Ann nih a thih hlan ah mau le ngaidi in thlam fate a sak i zarh thum an hngah hnu ah raifanh zawtnak nih a tlak i a thi. Ann a thih hnu ah cu thlam fate ahcun Adoniram le a fanu Maria long cu khua an sa. A fanu te cu April 24, 1827 ni ah a thi ve. Adoniram caah mi ramdang ah tuarhar ngai in a um. Ann nih a thih lai ah a zohkhenhtu nu sin in a pasal Adoniram Judson a cah mi bia: 

"Ka saya cu a tlunnak ding caan a sau tuk rih. Keimah te lawng in maw ka thih ne ko lai; ka fanu te lawng in maw ka kal tak ne ko lai. Pathian duhnak a si bantuk in, a duhnak cu al lo in ka zulh ko lai. Thih cu ka ttih lo, nain hi tluk tuarhar mi fahnak tuar khawh lo ding tu ka phang. Ka saya cu ka zawtnak a fak tuk i ca ka ttial kho lo tiah rak ka chimhpiak te ko kun law." 

Ann a thih hnu ah Dr. Judson cu a nun chung vialte Kawl Bible a let. 1835 kum ah a liim. 1840 ah USA ah an nam. English-Burman dictionary a tuah mi cu 1826 le 1852 ah an nam. Dr. Judson cu damlonak nih a tlaih caah USA ah tlun ding in tilawng in a kal. Lampi rili cung a kal lio ah April 12, 1850 ni ah a duhbik le a dawtbikmi a Bawipa rian ttuan bu in a nunnak cu a liam ve. A dawtmi US chungkhat zong a hmu manh hna lo. A ruak cu phum hmanh tong lo in rili pi chungah an paih. Nga rawl ah a cang. 

Ruah ve tlak thinlung in:

 Jesuh Khrih a zum i Bawi le Khamhtu ah a pom hnu ah Pathian thawngttha ruangah harnak vialte tuar in nunnak a pe mi siangbawi te hna hi an hrintthan lo, hell ah an tla ko lai tiah a chim tawn mi zumtu kan um ttheu. "Zumhnak, hrintthan/thar le thawngttha chim" an ti duh mi hi zeidah a si hnga? ti hi ruah lo awk a ttha tawn lo. Jesuh Khrih vel hna hi a man kan den ter tuk sual lai ti hi phan a um ngai. Temtuarnak um lo in kaa lawng in Thawngttha chim hi a tu lio kan chan ah a awl tuk cang caah. 
********************************
 

References: 

 1) Faith Coxe Bailey Ed. "Adoniram Judson, America's First Foreign Missionary," (Chicago, Moody Press, 1955).  

2) Maung Shwe Wa & Genevieve & Erville Sowards, "Burma Chronicle," (Rangon, Board of Publications, Burma Baptist Convention, 1963). 

3) C. Duh Kam, "Christian Mission to Buddhists in Myanmar: A Study of Past, Present, and Future Approaches by Baptists," A Dissertation Submitted to the Doctoral Studies, United Theological Seminary, Dayton, Ohio, May 1997).