CBCUSA Mission Consulation

CBCUSA Mission Consultation cu CEBC, Indianapolis, IN, July 21-22, 2016 ni ah tuah a si.  Minung 130 hrawng kan si.  State dang le khua dang khrihfabu hruaitu 100 leng an rak kai kho.  Consultation papers chuahpitu hna:

1) Rev. Dr. C Duh Kam, GS le Rev. Chan Thawng Lian, Secretary of Mid America CBC

CBCUSA MISSION CONSULATION

CEBC, Indianapolis, IN

July 21-23, 2016

Biadomhnak

Rilipi kam ah aa dinmi sangphalawng pi cu ti kam ah fek tein hren a hau.  Fek tein hren lo ahcun rili ticawl nih a thial khawh. Cu bantuk in Khrihfabu hi Bible zumhnak bia in tha tein hren a hau ve.  Hren lo ahcun zumhnak le cawlcanghnak phun dangdang nih a kenkip ah a thui khawh.  Mission riantuan hi Bible chirhchan in tuan kan hau ve.  Mission rian kan tuannak ah zumhnak le cawlcanghnak dangdang nih a thui lo ding hi ruah a hau ve.

Vawlei kalning le chan zulh in mission riantuan ning cu remh lengmang a si tawn.  1930 le 1940 hrawng ah mission riantuannak ah social gospel timi minung hawi ca riantuannak kong kha biapi tuk in rak chim a si.  Khrih Thawngtha kha si lo in, minung herhmi kong kha biapi in chim a rak si.  Biaknak dang minung sin ah Thawngtha chim lo in, an biaknak ah biatak an timi hna va ceihkhanpi te hna kha hman a si tawn.  Minung nih kanmah tein kan harnak cu daihter kan i zuam tawn.  Nain, Pathian tel lo in minung ngai nih kan tuah khawh taktak mi hi a um kho lo.  Minung nih kan zulhmi lam kong cu Profet Jeremiah nih “Maw Bawipa, minung nih a zulhmi a lam hi amah nih aa thimmi an si lo i a nun chung i a kalnak lam zong hi amah nih aa ser khawh mi an si lo ti kha ka hngalh” tiah a rak ti (Jeremiah 10:23).  Pathian zumhnak he rian kan tuannak tu hi khrihfami hna kan thawnnak cu a rak si.

Mission Thawhkehnak

Mission cu minung in si lo in, Pathian in aa thok. “A nungmi Pathian hrimhrim hi Missionary a si” [John R. W. Stott].   “Mission cu Theology ih nu a si [Mission is the mother of theology)” [Systematic theologian Martin Kahler]. Eden dum ah Adam le Eve nih Satan tukforhnak chung ah an tlau tikah Pathian nih a rak hawl hna. “Adam, Khawi dah nan um?” tiah a rak auh (Genesis 3:9). Pathian nih minung le A thilser hna he pehtlaihnak le remthannak cu tuah aa zuam peng.  Pathian hi petu a si.  Kan hrampi a si.  John 3:16 ah Khrih nih Pathian nih vawlei a dawtnak le khamhnak kong cu a kan chimh.  Amah cu nunnak ti a si.  Kan zeizongza a si. Pathian nih minung kan cungah a thatnak le dawtnak kong hi chim ding ah fial kan si.

Biakam Hlun Mission

Pathian nih Israel miphun hna cu Izip saltannak in a luat ter hna.  Nawlbia Pahra a pek hna (Exodus 20:3-17).  An tahnak aw a theih, an tuartemnak a hmuh, khuaruahhar nak he lam a hruai hna. 

Pathian mission cu A dawtnak ruangah a si.  “Bawipa cu zaangfahnak le vel ngeihnak in a khatmi Pathian a si (Exodus 34:6-7).  A mission riantuantu ding a thim hna.  Moses cu Israel miphun hna saltannak chung in an luatnak hnga caah a thim (Exodus 3:10).  A auhnak aw theih tikah mission cu Pathian rian a sinak a lang.  Moses nih amah kut in a miphun hawi hna cu khamh aa zuam.  Midian ah a auh tikah a santlaihlonak aa thei, Pathian mission hi phurh khawh ding in a ruat lo.  Mission rian cu Pathian rian a si kha a rak hngal lo.  Pathian cu a rak el.

Moses nih Pathian mission cu phun li in a el:

  1. Faraoh sin ah kal i Israel mi chuahter ding ah kaa tlak lo a ti (Exodus 3:11). Amah le amah thawnnak kha aa dap.  Pathian nih “Keimah nih kan umpi lai i Keimah nih nangmah kha kan thlah ti cu a langhter lai” a ti (Exodus 3:12). 
  2. Na min an ka hal tikah zeitindah ka chim lai?  a ti (Exodus 3:13).  Pathian nih “Keimah cu Keimah ka si ko” tiah a ti (Exodus 3:13).
  3. Ka bia an zumh lo i an ngaih duh lo ah teh? a ti (Exodus 3:14).  Pathian nih Moses cu “Nan pupa hna Pathian nih a ka thlah” tiah va ti ko a ti (Exodus 4:1).  Pathian nih khuaruahhar tuah khawhnak a pek.  A thiangthut cu rul ah a can ter.  A kut ah thinghmui hma a chuak i a dam ter.  Ti kha thisen ah a can ter (v. 9).
  4. Moses nih “Kei cu biachim holh rel thiam lo mi, mi ka hak, le leicum kaa aa ka si” a ti.  Biachimtu ah Aaron a fial piak (Exodus 4:14-15).

Moses nih minung lei kap in bia a chim peng.  Pathian nih mission cu Keimah rian a si tiin a langhter.  “Izip mi cungah ka tuahmi cu nan hngalh, cun mupi nih a fa kha a thla in a cawi bantuk in kan cawi hna i ka sin kan phakpi hna kha nan hngalh fawn. Cu caah, ka nawlbia kha nan zulh ahcun, ka mi hrimhrim nan si lai” tiah Israel mi cu a ti hna [Exodus 19:4-5].

Biakam Thar Mission

1. Pathian nih vawlei ah mission riantuan a thok.

2. Jesuh Khrih nih A pa mission rian cu a tuan.

3. Thlarau Thiang nih mission riantuannak caah thawnnak [power] a pek hna.

4. Khrihfabu nih Pathian mission cu vawlei ram kip ah a phurh.

5. Cu ti cun, vawlei nih Pathian mission kong a theih i a cohlan.  Pathian Pennak cu vawlei ah a tlung.

Pathian nih mission rian a tuanning zoh tikah a bu in riantuan hi aa thim:

1.  Pathian nih Pa le Fapa le Thlarau tiin a bu in rian a tuan.

2. Jesuh Khrih nih Pathian mission riantuan ding in zultu tampi a ser hna.

3. Thlarau Thiang nih zultu hna sin ah Thawnnak in aa phuan tikah Peter phungchimnak in ni khat ah zumtu thar 3000 tluk an i chap [Lamkaltu 2:41].  Khrihfabu lianpi a dir colh.  Bu riantuannak an thok colh.  Vawlei ah Pathian ram kauhnak riantuan ding in thazaang an hlum.

4. Hi tluk in Pentecost thlarau thawnnak in an khah lio ah minung kong van ceih a hauh caah an buai colh (Lamkaltu 6:1-7).  Grik holh a hmangmi Judahmi hna le Judahmi karlak ah buainak a chuak colh.  Lamkaltu 12 nih "Kannih nih Pathian bia chim kha thlahdorh riangmang in tangka i phawtnak kong lawng kha kan tuah ahcun a hman hnga lo an ti.  Thiang Thlarau le fimnak in a khatmi hruaitu 7 an thim hna (Lamkaltu 6:5).  

5. Cu ti cun, Pathian bia cu a karh chin lengmang.  Jerusalem khua chung ah khan a zummi cu an tam chin lengmang i tlangbawi tampi zong nih cu zumhnak cu an pom ve (Lamkaltu 6:7).

Paul nih cun Damascus khua pawng ah lungthlennak a hmuh tikah Khrih nih a riantuan ding ah auhnak a si tiin a ruah.  Thawngtha chim duhnak a ngei.  Khua kip ah kal in Thawngtha a chim.  Khuapi lian deuh ah Khrih kong cu a aupi.  Khuapi in khuate ah Pathian bia hi a karh.

Bible Cathiang ning tein, Pathian ramkauhnak mission rian cu a bu in tuan ti ding a sinak a lang. Khrihfabu hi a bu in aa hlum mi Khrih pum kan si.  Chungtel members hna kan i hlum lawng ah kan thawng.  Biaknak bu hi kan i hlum lawng ah kan thawng.  Pumpak le mah khrihfabu lawng in rian ka tuan lai ti hi hlawh a tlin ding ning tluk in a tling kho tawn lo.  Pathian thawnnak hi mibu chung ah chak ngai in a lang kho.  Mah te lawng in kan thang kho lo.  

Cu caah, leikhuaza Chin khrihfabu vialte nih a bu in riantuan hi kan cawn a hau.  Kan i zuam a hau. Cu ti cun, Pathian ram cu kan kauh te khawh ve lai. Santlailo kan Chin miphun hi kan cawisan khawh lai.

Mission hi kan tuan lai maw?

Thlaici tampi kan tuh ahcun tampi kan zun lai (2 Korin 9:6).  Mitthli he thlaici a tuhmi nih lunglawmh aunak aw he an zun lai [Salm 126:5].  Khrihfabu cu mission riantuannak in kan tah khawh.  Tampi a tuhmi khrihfabu le zumtu hna cu mi teitu an si hrimhrim ko lai. Pathian sin ah kan pekmi cu a let in an kir than.  Sehtan sin ah pekmi chaw cu an lotlau dih.

  1. Mission cu Pathian ta a si caah khrihfabu nih daithlanh awk a tha lo.
  2. Pathian nih riantuantu hi hriamnam a pek hna.  Chim thiamnak a pek hna.  Ralthatnak a pek hna. 
  3. Pathian nih A missionaries hna cu Amah kong ah fiannak a pek tawn hna.  Nun a cawnpiak hna.  Mah sunparnak caah riantuan a si lo.  Toidornak thinlung he mi dang nak in ka tha deuh tiah ruat lo in tuan a hau (Filipi 2:3).
  4. Mission cu pumpek taktak in tuan haumi rian a si.  Mi nih an cohlan khawh lo hmanh ah lungsau in lam a phunphun in kawl a hau.

Herhmi:

1. Mission riantuannak caah thlacamnak,

2. Khrih zultu tha chuah khawhnak lam (strategies),

3. Thawngtha chim ding in timhtuahnak le cawlcanghnak (mobilization).

4. Area le hmun le minung kha zohchih in riantuannak (engaging). 

Phurhmi Thawngtha hna

1. Vancung Pennak Kong

Jesuh Khrih nih Vancung Pennak kong cu a chim. “A caan a phan cang, Vancung Pennak cu a nai cang, Nan sualnak i ngaichih ulaw Thawngtha bia hi zum tuah u” a ti (Marka 1:15). Vawlei ah Vancung Pennak kong chim ding ah mission riantuan fial kan si.

2. Jesuh Khrih Kong

Vancung Pennak kong lawng si lo in, Khrih kong chim hi kan mission rian cu a si.  Hlan lio Khrihfa mi hna nih “Jesuh cu Khrih [Pathian chititoihmi] le Messiah a si” tiah an aupi [Lamkaltu 5:42].  Khrih kong cu hmun kip le ram kip ah an chim. Khrih kong Thawngtha chimnak le Vancung Pennak Thawngtha chimnak cu an kal ti.  Pentecost Ni ah Peter nih fiang tein Khrih kong cu a chim.  Khrih cu vailamtah cung ah thah a si.  Pathian nih a thawngmi a kut in a thawh ter tiah a aupi.   Pathian nih Jesuh Khrih in khamhnak rian a tuannak kong cu an chim (Lamkaltu 2:14:39).

Mission Riantuanning

Tuanning phun thum hi an zohchih:

  1. Theology (Pathian bia)
  2. Social Sciences (Culture/Nunphung)
  3. Strategies [ningcang]

Nunphung le riantuan ningcang hna cu an i dan hmanh ah Pathian bia ah an i bunh dih awk a si.  Pathian bia cu mission riantuannak a hrampi a si. Pathian bia ruang ah mission rian hi kan tuannak a si. Pakhatnak a si zungzal lai. 

Midang nunphung le sining hna kha tha tein hngalh le zohfel kan hau.  Mission rian kan tuannak minung hna nunphung le sining le khrihfabu dirhmun kha hngalh bu in riantuan ahcun hma a kal kho bik. 

Caan tampi cu mission riantuantu hna cu a tuan ningcang ah an buai tawn. Riantuan ningcang hi cu Pathian mission rian ah a lubik/a biapibik ah chiah awk a si lo.  Sal dirhmun ah a um awk a si.  Pathian duhnak kha pakhatnak ah chia in mah duhnak cu fak tuk in dirpi lo a herh.  Lungrual tein tuan a hau.

Mission Rian in Khrihfabu Sernak ah

Mission rian kan tuannak ah siseh, hmun thar ah kan umnak ah siseh, khrihfabu cu dirh kan hau.  Kan khrihfabu hna hi a tanglei bantuk in kan than a herh:

  1. Khrihfabu dirh tikah hawikomhnak kha biapi bik in ruah a hau.  Khrihfabu cu Pathian chungkhar, Jesuh Khrih pumsa a si (Ephesians 1:23).  Pathian miphun kan si (I Peter 2:9).  Hi zumhnak hi a thawn i chungtel zumtu hna thinlung ah a nun ahcun khrihfabu cu a nuam.  Mi tha a nuam. Zaang a dam.
  2. Khrihfabu in kan dir tikah member/zumtu thar hna kan hmuh lai timi ruahchannak a um lo ahcun thanuamnak ruahchan ding a tlawm.  Mah umnak hmun ah zumtu thar sawm ding an um lo hmanh ah, ram thar hmun ah zumtu thar kan kawl a hau.  Zumtu thar a ngei kho lo mi khrihfabu cu “A thei tlailo mi theipi kung” bantuk a si [Matt 21:18-19].  Khrihfabu member hna zong ah thei a tlai kho mi zumtu hmuh chuah ding kong kha cawnpiak kan hau hna.  Mission riantuan duhnak an ngeih cio ding ah cawnpiak ding cu pastors le upa dihlak kan tuanvo a si. Mission riantuan a herhnak cu i chimh chin kan hau.
  3. Khrihfabu cu hi vawlei ah Pathian Pennak a langhnak a si ti hi kan hngalh zungzal a hau. 
  4. Khrihfabu chungtel hna cu thlarau ti rawl in cawmken an hau.  Pumsa in herhmi hna kha theihpiak i bawmh an hau fawn.

Khrihfabu Thar Ser Tikah Theih Herhmi

1. Thawngtha chimnak khua le hmun hna caah biatak tein thlacam a herh.  Mission riantuannak cu Khuachia riantuannak hrawh awk caah a si (I John 3:8).

2. Pathian khrihfabu cu zeibantuk in dah a langh awk a si ti kha khrihfabu dirhtu nih cun a cuanh lai.  Nunphung le sinak aa dangmi hna caah an cohlan khawhmi lam cu kawl piak an hau.

ICBM RIANTUANNING

INDIANAPOLIS, INDIANA, USA

ICBM MYANMAR

HAKHA, CHIN STATE

 
   

Paletwa                                 Kanpalet                               Mindat                      Gangaw

  1. CBCUSA, Indianpolis, IN in thithruainak le tawlrelnak
  2. Asia, Australia, New Zealand, le Europe missionary cawmtu khrihfabu hna
  3. ICBM, Hakha, Chin State
  4. Mission Fields

Mission kong ah Nitlaklei Khrihfabu hna le Chin Khrihfabu hna kan i dannak

Nitlaklei khrihfabu tampi nih mission rian an tuan tikah an bu nih an ngeih ciami chung in riantuannak an suaisam.  Kannih Chin khrihfabu hna nih mission rian kan tuan tikah ngeih cia mi in si lo in, zumhnak in thawhlawm pek cio ding in kan suaisam. 

Nitlak lei Khrihfa Biaknak An Thihnak Aruang

A bu in riantuannak thazaang an pe ti lo.  American democracy nih pumpak sinak (individualism) hi fak tuk in thazaang a pek.  Baptist nih kan hmanmi local church autonomy zong hi abu in riantuan duhnak thazaang a zawrtertu a si ve kho men.  Mah khrihfabu ca zawnruahnak lawng a thawn tikah national level in mission riantuannak thazaang an ngei kho lo.  Bu in riantuannak a zawr ahcun mission riantuannak cu a tla.  Khrihfa biaknak cu thih aa tim cang.  A tu bantuk in a kal ahcun hi hnu kum 25 chung ah khrihfa biakinn tampi cu an khar te lai.

Khrihfa biaknak cu Asia, Africa le Latin America ah a karh.  Pentecostal hi an karh ngai fawn.

Dr. Detlef Blocher nih cun “Kan vawlei nih a tonmi hi a lian tuk cang i khrihfabu pakhat maw, agency pakhat men in mission tuan awk a tha ti lo.  Fimnak, chawva, thiamnak le riantuantu tamtuk a herh cang.  Riantuannak hi hlum a hau.  Jesuh Khrih nih a zultu hna lungrual tein an umnak ding ah biatak tein thla a cam” tiah a ti (John 17).

CBCUSA churches hna hi missional churches si kan herh.

Mission: Khrih nih a kan fial bantuk in, khrihfabu nih Pathian sunparnak caah Thawngtha chimnak a si.

Missions: Khrih Fialnak a tlin khawh nak ding ah Bible bia le minung sining le nunphung hna zohchih in a phunphun in mission riantuannak a si.

Missional: Khrih zumtu pumpak le khrihfabu nih thlarau tlaumi hna khamhnak le zumtu thar hna hmuhchuahnak caah Thawngtha chim ding tuanvo ka ngei tiin thinlung ngeihnak a si.

Mission le Evangelism cu Khrihfabu thawnnak thazaang a si. Mission cu Khrihfabu thazaang ah a can khawh nak ding ahcun kan zumhnak aa tel a hau.  Kan khrihfabu hna thathawh ter an hau.  Mission le zumtu pumpak kha pehtlaih ter kan hau hna.  Mission rian ah zumtu pumpak hna hi zumhnak he an i tel khawhnak ding kha ruahpiak kan hau.

Kan khrihfabu zumtu hna missional si ding ahcun:

Zumtu                                    Mission

  1. Mission thawhvo hi an zumhnak in a ra ding a si.
  2. Mission ah an zumhnak a langh a herh.
  3. Mission le zumhnak cu an kal ti a hau.
  4. Zumhnak ngei lo/hrinthan lo caah thawhlawm pek a awl lo.
  5. Zumhnak kong cawnpiak a herh chih, an hrinthannak ding caah.
  6. Hrinthan lo mi cheu khat nih miphun tanhnak thinlung [nationalism] ruang ah mission hi tha an pek ve.  An i tel kho ve. Nationalism lawng cun a za lo.
  7. Evangelism le nationalism komh kho hna sehlaw an cak ngai lai.  Hrinthan kan hau dih tinak a si. Khrih zumhnak cu a hrampi a si.
  8. Hrinthanmi si hnu ah thlarau tlaumi hna zawnruahnak a tam deuh.  Mission rian ah biatak khawh deuh a si. 
  9. Local churches hna le pumpak nih mission rian kan tuan ruangah kan laksawng hmuh ding mi kong hi Bible chirhchan in tampi chim kan hau.
  10. Mission rian cu Pathian sin ah zumhnak thlaici kan tuhnak a si kha fianter kan hau.  “Thlaici tlawmte a tuhmi nih tlawmte an zun lai; tampi a tuhmi nih tampi an zun tawn” (II Kor 9:6) hi kan nolh than.

CBCUSA Mission Riantuannak ICBM caah 2% Thawhvo

Khrihfabu thawhlawm in pek a si caah a cawlcanghning hi organization le churches pehtlaihnak lawng a si ti khawh a si. 

Churches/organization                                Mission

Pastors & Deacons                                        Mission

Percentage in pekmi thawhvo hi riantuantu pastors le khrihfaupa lawng nih kan tawlrel. Khrihfabu sin ah chim a tlawm.  Chim thiam ngai mi upa zong kan tlawm.  Upa paoh nih chim ding ah kan ruat lem lo.  Cu caah, mission riantuan ruang ah khrihfabu ah thlarau lei in kan hlawk khawh ding tluk in zumhnak lei in hlawknak kan hmu lo.

Mission rian ah khrihfabu chungtel dihlak tel khawhnak

Lairam ah CCOC mission rian tuan lio ah April 1988 - April 1991 chung hi Lairam ah pastor rian ka tuan ve.  ZBC [atu CBC] Executive Committee member ka si ve.  CCOC feeling cu ka rak tem bal ve.  Thlarau tlaumi hna tlaihnak sermon cu ka rak chim duh cem mi a si ve.  Ka kaa a rak thaw ngai.  Kan doctorate thesis ah CCOC kong hi ka telh ve.  Ka chim duhmi cu CCOC tuanbia si lo in, Laimi nih zeitluk in dah mission rian ah an rak tan ti hi langhter ka duh. Laimi cu sifak kan si.  Tangka cu zapi nih kan ngeih lo caah a ngei deuh nih CCOC riantuannak caah sia, caw le vok hna an hlut.  Santlai lo chungkhar le nuhmei nih arte le vokte kha an rak pek.  Lothlo mi nih an lo kil ah le an leikuang pakhat cu CCOC caah an hlut.  Cu ti cun, a ngei deuh le sifak he kan si khawh nak zawn cio in kan i tel kho.

ICBM riantuannak ah mi zapi tel kho ding in thawhvo hi phun tam deuh tuah a hau ve:

Missionary cawmnak:

  1. $ 2000.00/year
  2. $ 100.00/month
  3. $ 50.00/month
  4. $ 20..00/month
  5. $ 10.00/month

Mission field biakinn le pastor inn saknak:

  1. $ 4000.00
  2. $ 2000.00
  3. $ 1000.00
  4. $  500.00
  5. $  250.00
  6. $ 2oo.00 or $ 100.00
  7. UTC Bible students bawmhnak
  1. $ 500.00/yr
  2. $ 300.00/yr
  3. $ 200.00/yr
  4. $ 100.00/yr

      8) CCU Students bawmhnak

  1. $ 1000.00/yr
  2. $  500.00/yr
  3. $ 300.00/yr
  4. $ 200.00/yr

Local Church Mission Committee Riantuannak

Khrihfabu hi mission riantuannak in aa hliphau kho bik. Mah khrihfa cio ah mi kip nih mission riantuannak caah chawpeknak in an i tel khawh cio ding ah thawhvo hi phun tam deuh in serpiak a tha:

  1. $ 100/month
  2. $ 50/month
  3. $ 30/month
  4. $ 20/month
  5. $ 10/month

Khrihfabu kip nih mission komiti tha tein ser a hau.  Riantuannak rep0rt hi fel tein tuah a hau. Khrihfabu nih mission riantuannak ah aa telmi hna kong cu thanh lengmang hi a tha.  Quarterly Newsletter ah thanh a herh.  Mission riantuannak kong cu chim tam a herh.  A tuantu nih kan fian i tha tein kan chim thiam a herh ngai.  Phaisa hi a biapi ko nain, mi nih tel duhnak an ngeih i thlarau thazaang an hmuh khawh ding hi a biapi deuh.  Dr. Billy Graham nih “Mi pakhat nih a fale le techin fapar hna sin ah tangka vawlei thil si lo in zumhnak le nunzia tha hi a roh deuh ding a si” a ti. Kan mission rian caah tangka kan kawl lio ah zumhnak in kan thang maw ti cu kan zohchih zungzal a hau.  Cu caah, tel khawh cio nak lam hi kawl piak a tha.

Mission Komiti nih a tanglei bantuk in cazin fel tein ngeih ding:

Date No. Name Amount [$] Herh dang Total
July 22, 2016 1. Rev. Arthur Carson $ 50.00 $ 50.00 $ 100.00
July 23, 2016 2. Pi Laura Carson $ 50.00 $ 30.00 $ 80.00
July 24, 2016 3. Lg. Zing Biak Tha $ 30.00 $ 25.00 $ 55.00
July 24, 2016 4. Pi Aungsan Suh Kyi $ 30.00 $ 70.00 $ 100.00

CBCUSA ram chung mission komiti pehtlaihnak le training tuahnak

  1. Local church mission komiti upa hna he pehtlaihnak
  2. Local church mission komiti chairman hna kha CBCUSA areas cio ah training pek ding
  3. Revival gospel team in lennak [area thimning in/khua cio ah]
  4. Revival gospel team hna hi pastors nih zulh ding
  5. Church kip ah training tuah khawh zuam ding
  6. Lay leaders tam deuh tel kho ding sawm ding.
  7. Mission Komiti ah upa le nu upa le mino hna telh ding.
  8. Phaisa fel tein kilven ding. Report cu fel tein tuah ding.

Myanmar Ram Chung Riantuannak

ICBM Myanmar Office

Ram dang in mission fields ah kan tlawn khawh lo caah missionaries le field directors nih an center ah an i ruah khawh ve ding mi office inn cu Hakha ah ngeih kan herh. 

  1. Office inn dawhte ngeih ding/International level in ser ve ding.  Hi office cu USA, Australia, le Europe ah pehtlaihnak tuahnak center a si lai.  Mission field dihlak thithruainak hmun a si lai.
  2. Mawtor ngeih ding.
  3. ICBM students, Hakha hna nih anmah inn ah an ruah khawh lai.
  4. ICBM office inn kam ah Eden dum dawhte tuah ding.  Pangpar le thingkung dawh tete cin ve ding.
  5. Hakha Christian Ministers Fellowship [HCMF] nih an ngeihmi hmun, Hakha Hmun Thar vailamtah tung kam 40 acres chung ah saknak nawl a kan pek cang.

ICBM Myanmar Ram chung Pehtlaihnak le Tuah Awktlakmi

  1. Hakha in Gangaw, Mindat le Kanpalet cu tlawn a awl ngai.
  2. Hakha in Rezua - Matupi - Paletwa ah mawtor lam a chuak cang. Hmailei ahcun pehtlaihnak a tha chinchin lai.
  3. Missionaries dihlak nih telephone tha deuh an ngeih khawh ahcun thawng an thanh khawh lai.
  4. An riantuannak caah a herhmi tha deuh in pek khawh zuam ding.
  5. An riantuannak report tialnak cauk le cafung tiang in rin ding.
  6. Camera le video camera hna ngeih a herh lai.  An riantuannak hmun ah an cawlcanghnak cu mit in hmuh khawh ding in information tuah thawn a hau.
  7. Computer pakhat cio hmanh ngeih ter a herh te lai.
  8. Chan a kalning a ran cang caah mission riantuannak le khrihfabu riantuannak ah media ah kan thawn a hau.  Kannih Chinmi cu media ah kan santlai lo ngai rih.  Mizo nih cun Mirang phungchim le movie tiang in an holh in an leh dih cang.  Laimi nih kan zoh bikmi an si.  Mission fields ah a thlahtu khrihfabu hna kong zong theih ter an hau. 
  9. A thlahtu khrihfabu nih hmanthlak le video clip hna tuah in mission field ah kuat ding.  TV le solar mei cawkpiak in khrihfabu film hna piah piak ding.
  10. Mission field zumtu hna zong video clip tuahpiak in an sining hmu ding in piah piak ding.
  11. Christmas le Kum Thar hna tuahpiak lengmang ding. 
  12. Mission fields ah riantuantu hna hi USA ah sawm lengmang ding. 
  13. ICBM students, Hakha le Chinram churches hna zong pehtlaihnak tuah that zuam ding. Vacation bantuk in Hakha churches le Lai khua dangdang zong ah len le tlawnpi ding.

ICBM misisonaries hna zumhnak

ICBM cu holistic mission rian a tuan hi a tha ngai.  Mission riantuannak hmun le minung hna thanchonter ding hi mission rian a si.   

  1. Biakinn le pastors/missionaries inn sak piak ding cu a herh.  Cu hnu ah, khrihfabu an nun khawhnak ding ah cawmken an herh rih.
  2. Christmas le Special Sunday/programs ah laksawng pek le rawl dumtinak tuah piak an hau lai.  Sunday School le sianginn kainak cauk/kedan le ngandamnak cu ruahpiak chih ding a herh lai. 
  3. A thlahtu le a tuantu [missionaries] dihlak nih pumsa thanchonak mission rian kan tuan lio ah thlarau lei in than kan herhnak kha pakhatnak ah chiah zungzal ding.
  4.  Pathian/Khrih/Thlarau kan zumhnak a thawn lo ahcun kan mission a thanning kha a bau lai.  Lungdongh caan zong a um kho. I pumpeknak hi a biapi taktak.
  5. Thlarau tlaumi hna tlaih duhnak thinlung thlarau ngeih kan hau.  Mission tuan duhnak thinlung ngeimi si kan hau.
  6. Social ministries cu kan tuah lai nain, mission strategies tu a si awk a si.  Zumhnak hi biapi bik in chim ding in cawnpiak an hau.  Social ministries hi mainline churches pawl nih kan hmanning a luan deuhnak a um ve.  Thlarau tlaumi tlaihnak ah kan zaang a der deuh caan a um.
  7. Pathian, Fapa le Thlarau kong hi fiang tein an chim khawh nak ding ah cawnpiak fel a herh ngai. 
  8. Khrih le A cawnpiaknak kong cu biapi bik in chim duhnak ngeih an herh.
  9. Mission riantuannak caah biatak tein thlacam a herh.
  10. Zumlotu hna lungthlennak cu Thlarau riantuannak a sinak hi an fian ngai a hau.  Chawva in a rum deuh tukmi Buddhists pawl nih an lak ah rian an tuan caah lungdong lo in, Pathian nih A Thlarau Thiang in a umpi an sinak kha thazaang ah I lak ding. 
  11. Buddhism cawnpiaknak hi zei maw zat cu an theih chih a herh ve.
  12. Contextual theology cu chimh peh lengmang ding an si. 

Missionaries hna cu hriamnam tling te he thlah ding

  1. An nunnak tlamtling ding in hlawh pek an hau.
  2. An thutdirnak inn cu tha deuh in sak piak lio a si.
  3. Biakinn sak piak hrimhrim kan hau hna. 
  4. Biakinn ah TV le khrihfabu movie piah ding mi chiah piak.
  5. Missionaries hna caah Bible, hla cauk, mei-inn, ruksai, nithong, lukhuh, uniform, calendar, planner, cafung, file, le herh dangdang cawkpiak ding.
  6. Telephone ngeih cio ding
  7. Cinthlaknak le inn saknak caah a herhmi tuhmui, namtawng, hluah pi/te, thirkhenh, le herh dangdang cawkpiak ding.
  8. Ngandamnak lei cawnpiak i relief medicine le raifanh si mum phun pawl kha zumtu hna caah cawkpiak ding.
  9. Satil zuatnak cawnpiak ding.
  10. Hunchonak mit an au deuh nak ding ah khuapi ah tlawn ter pah ding.

Mission Riantuannak Reports

Fel tein tuah ding.  Paul nih “Bia cu tha tein an theih lo ahcun zeitindah an zumh khawh lai?” tiah a ti [Rom 10:14].  Kan riantuannak theipar kan hmuh lawng ah kan khrihfabu dihlak caah thanuam lawmhnak a si lai.  Riantuannak report cu kan riantuannak kong kan theih khawh nak caah a herh.

Kan riantuannak kong hi mi dang theihter a har tuk.  Kan umnak aa dang.  Kan i leeng kho lo.  A chan hoih in biaknak riantuannak ah media hi biatak tein hman thiam kan hau.  Kan riantuannak reports cu chungtel khrihfa zumtu hna dihlak sin ah kan phak ter a herh.  Cu ti cun, phaisa thawhlawm an pekmi nih thlarau a tlaumi hna a khamhnak kong an theih tikah pek chin lengmang an duh lai.

Missoin Fields in report peknak form:

No Field New Believers New conversion Baptism Church building Pastor

quarters

Health

care

Education
1. KTBA 60 25 10 4 6    
2. VM 70 6 6 3 4    
3. MB 30 1o 10 6 3    
Total   160 51 26 13 13    

 

USA ah CBCUSA mission riantuannak:

US ram chung khrihfa biaknak cu duhsah in a tumchuk chin lengmang.  Europe ram chung khrihfa biaknak cu a tumchuk taktak.  Vawlei sining a thangcho tuk tikah Pathian hi herh lo in kaltaak a awl tuk cang.  Hi ram le vawlei ah kan um caah kanmah Chin khrihfabu hna kan caah a him hlei lo.  Cu caah, mission riantuannak program kan ngeihmi hi a biapi tuk.  Khrihfa kan sinnak a thawntertu a si lai.

Ramchung Mission [USA]:  Chinram in kan i phorhmi thluak cu a tuan ngai rih.  Kum 60 chung Kawl ralkap cozah nih a ka cawnpiakmi thluak zong a tang rih kho men.  Velngeihnak nak in nawlngeihnak tu hi khrihfabu tampi ah a thawng rih kho men.  Kan fanau hna thluak cu a hmunhma zulh in a thang ve.  Miphun dang nunphung le vawlei hmuhning [world view] dang lak ah a thanglian mi an si caah nulepa thluak cu an cohlang kho ti lai lo.  Nunlepa duhmi le an duhmi cu zohthiam hau ngai ding a si te lai.  Cu caah, ramchung mission cu ruah ve a hau.  CBCUSA zumtu hna hi mission rian nunpimi [missional] kan si ahcun mission caah phaisa tampi kan ngei kho lai.  Ramchung le ramleeng mission cu kan tuah kemh khawh ko lai.

Ramchung mission tuan khawh ding mi hna cu:

  1. CBCUSA ram chung ah,
  1. Fimcawnnak [education] ministry
  2. Evangelism [Thawngtha chimnak]
  3. Christian family ministries
  4. Kan fanau hna nih ABCUSA le BWA zong ah riantuantu an si khawh ding tiang in theological education an kai a hau lai.  Sianginn tha deuh ah a kaimi an si a herh lai.
  5. US government jobs a tuan kho mi an si ding tiang in fimnak lam hmuh cu an herh ngaingai lai.
  6. Kan umnak rammi dang sin ah
  7. Phaisa tampi a dih ding a si.  Nain, rammi khrihfabu hna he i komh in urban ministries cu kan tuah khawh ve ko lai. Tuahnak in Thawngtha chimnak [social ministry] cu tuah khawh ding phun tampi a um ko.
  8. Rammi khrihfabu hna nih mission tuanduhnak thinlung an ngeih khawh nak ding ah CBCUSA khrifabu hna cu tlang cung ah tlakmi khua bantuk in Pathian kan duhnak cu a langh ve a hau lai.

Biafunnak:

Mission rian tampi tuan kho ding ah kan khrihfabu le riantuantu hna hi kan i fun a hau. Kan khrihfabu hna hruai khawh nak ding ah hruaitu pastors le khrihfaupa hna hi hruaimi nih an i daw tiin an kan hmuh khawh ding hi a biapi tuk.

Ruah ti ding ah chuahpi duhmi

  1. Kan khrihfabu cio ah mission riantuan duhnak taktak kan ngei in nan ruat maw?
  2. Mission riantuan cu thothan Jesuh Khrih nih a kan fialmi a si. Mission hi tuan lo usihlaw khrihfabu caah a poi tuk lai maw? A poi hnga lo dah?
  3. Kawl Buddhists pawl nih Thlang Chinram ah mawtor in thing le tlakrawh an phurh i pura an sak cuahmah cang.  Nah Tah Lah sianginn le 969 Buddhist programs nih Thlang Chinram ngakchia le sifak cu an sianginn ah chiah dih an timh hna.  Annih cu an rum.  Phaisa in cawk an timh hna.  Hi zumlotu hna riantuannak in chanhchuah lo ahcun kan miphun zatceu cu an tlau ko lai.  Zeitindah na thinlung nih a tem ve?
  4. Hi mission riantuannak ah zei tluk in tah tan nan duh cio? 
  5. Hi tluk in zumlotu hna nih rian an tuan lio ah Pathian nih A dirkamh mi zumtu kan sinak nih kan thinlung a thawn ter maw?
  6. Mission riantuan duhnak thlarau hi hi consultation ruang ah kan ngei kho deuh lai tiin kan ruat maw?
  7. Kan thinlung cio ah biakhiahnak kan ngeih khawh mi a um maw?
  8. Mission riantuannak caah tam deuh kan tho kho cang lai maw?
  9. Profet Isaiah sin ah Pathian bia cu “Ahodah ka fial lai?  Ahodah kan lamkaltu a si lai?” ti a si.  “Keimah ka kal lai!  Ka thlah tuah!” tiah a leh [Isaiah 6:8].  Kannih nih teh Profet Isaiah bantuk in Pathian nih kan let kho ve lai maw?  Thothan Jesuh Khrih nih a kan fialmi cu kan tuan duh ve taktak lai maw?
  10. ICBM nih tuan ding in aa timhmi vialte hi kan tuan khawh lai tiah kan ruat maw?
  1. Thawngtha chimnak
  2. Missionaries hna inn saknak
  3. Biakinn saknak
  4. Medical clinic tuahnak
  5. Boarding schools tuahnak [Education]
  1. Mission fields in khrihfabu cu an dir hna.  Mah tein an dir kho cang.  Khi tikah Thlang Chinram le Chak Chinram khrihfabu hna hi kan dir ti lai i kan Chinram ah Khrih Pennak cu a kau chin lai si kaw, na mitthlam in na cuan ter kho maw?

 

References:

 

  1. Perspectives on the World Christian Movement, A Reader Edited by Ralph D. Winter and Steven C. Hawthorne, by The Institute of Interantional Studies, William Carey Library, Pasadena, CA 91104, 1981.
  2. Missions, Biblical Foundations & Comtemporary Stragegies, Gailyn Van Rheenen, Zondervan Publishings House, Grand Rapids, Michigan, 1996.
  3. Trasforming Mission, Pradigm Shifts in Theology of Mission, David J. Bosch, Orbis Books, Maryknoll, New York, 1992.
  4. Internet: www.biblicalstudies.org, uk/pdf
  5. Internet: www.hchc.edu/missions Orthodox Christianity