British Baptist Mission

British Baptist nih Kawlram ah 1807 in rianttuan hram an thok i caan tawite long an ttuan. Richard Mardon le James Charter kha Bengal in an ra. Mardon hi India siangbawi William Carey fapa Filex Carey nih a thlen colh. Mardon le Carey cu Kawl ca an cawng. Mardon nih kum li an um chungah Matthai cauk hi Kawl holh in a leh i Serampore ah an nam. Filex Carey cu Kawlmi a duh ngai hna. Kawlnu kha nupi ah a tthit caah Kawl siangpahrang he an i pehtlaih ning a ttha. Ava khua ah 1814 tiang a um. Rangoon Kawlmi nih cun ramdang mi an rak duh hna lo. Rangoon khua leeng khan hnih a hlatnak, minung thawng riat/hra hrawng umnak khua hnawm ngai mi ah Filex Carey mission inn cu a rak um. Filex Carey cu a nupi le a fa le kha an vokkuanglawng a lehnak in an thih hnu cun Kawlram ah mission rianttuan kha a lung a dong. American Baptist siangbawi nuva Rev. Adoniram & Ann Judson cu 1813 kum ah a sinah an phan i thla ruk chung an um tti. Anmah sin ah mission rian cu a pek hna. 1814 ah British Baptist Mission rianttuannak cu a dih.