Catholic Mission

Kawlram ah Pathian thawngttha a rak chim hmasabik mi cu Portuguese ram in Roman Catholics an si. Kum zabu 16nk le 17nk chungah Europe chawhrawl hna sinin Nitlak Asia, Persia le India in an ra i Pegu khua an phan. Kum zabu 17nk thokka hrawng ah Kawlram ah khrihfa an ti mi hna cu ramdangmi an si. Kawl nih kalas an rak ti hna. A cheu cu Kawlnu a tthi mi Europe mi an si. India nitlak thlang ah a um mi Negroes an si fawn.

Kawlmi nih Khrihfa ah can ahcun kalas biaknak a biami le miphun sinak a thlau mi ah ruah sual lai kha an phang. Khrihfa ah an rak cang duh lo. 1500 hrawng ah Portuguese chawhrawlmi nih Kawlram ah khrihfa biaknak cu an rak phurh tiah J. Guenno nih cun a ti ve. Kawlmi sinah Pathian Thawngttha chim hmasa tu cu French Franciscan, Pierre Bonfer (1544 kum) a si. 1666 kum ah Ava khua ah Catholic tlangbawi a rak um. Khua 11 ah Catholic hi 970 an rak um. China ah rianttuan mi Italy Catholic tlangbawi hna kha Chinese khuahun nih a duh hna lo caah Kawlram lei ah 1719 kum ah an ra. Cu hna an rat ahcun Syriam le Ava khua ah Portuguese tlangbawi pahnih an rak um cang. Hi hna nih mithar a ra mi an rak duh hna lo. Ava Kawl siangpahrang sinah mingiatu an si tiah an leirawi hna nain Kawlbawi nih a rak duh hna. Phungchimnak nawl a pek hna. Portuguese tlangbawi hna cu anmah ramdang mi caah rian an ttuan. Anmah holh long in holh an duh. Kawl holh an cawng duh lo. Italian tlangbawi nih cun Thawngttha chimnak ah Kawl holh thiam a hau an rak ti i an cawng. Biaknak long si lo in, khua le ram le uknak lei kong zong kha biapi in an rak ruahpi hna. Italy le Portuguese in tlangbawi tam deuh an thlah hna i Kawlmi lak ah rian an ttuan. Kum zabu 18nk a donghnak lei ah khrihfa hi 2000 hrawng an rak um.