Chin Christian College

CCC hi Hakha khua ah a um mi college a si. Cozah ttha ngeih ahcun Hakha bantuk state khuapi ahcun college pakhat cu um ding a si. Nain, sianginn an kan tuah piak lo caah biaknak in CACC tthithruainak tangah Chin Christian College hi dirh a si. Lairam ah a ummi khrihfabu kip i tel in tuah mi college a si.caccBaptist khrihfabu hi a tambik si ruangah anmah hi retheibik ah an tla. Hi sianginn in diploma le degree a la mi hi za tam an si cang. Hi sianginn ah Dip. Theology, Bachelar of Theology le Bachelar of Religious Education an chimh. A rauh hlan ah Master of Divinity hi tuah kho ding in duhnak an ngei. Chin Christian College hi siangcachim hna an fel caah cathiam tampi an chuak. Myanmar Institute of Theology ah M.Div program luhnak caah caminpuai an tuah tawn ah khin CCC in a chuak mi sianghngakchia cu a thiam bik an si tawn. Cu caah, a min a ttha. Kachinram le Kawlrawn hna zong in Chin Christian College ah ca an rak cawng.

Hi sianginn hi kan cozah nih college a kan tuahpiak lo caah Chin Christian University tiangin va si kho sehlaw, biaknak lei fimnak long si lo in, vawlei lei fimnak zong cawn khawhnak sianginn ah cang kho sehlaw tiah mi tampi nih saduh an that. Lairam ngak Chinmi le ramttha leng Chinmi vialte le Chin Baptist Churches le Christian Churches vialte nih lungkhat in ttuan kan duh ahcun tuah khawh ding a si. CCC in cawngchuak cia mi vialte hna nih i khawmsua hna sehlaw hi sianginn caah tampi an ttuan khawh cang lai.

Chin Christian College kan ngeih ruangah Chinmi nih kan hlawk mi a tam tuk. Kanmah le kan hmunhma te ah hruaitu ttha mifim tampi an chuak. Laica kan thiam deuh. Mirang holh kan thiam deuh. Biaknak rianttuan lo zong ah zeidang rianttuannak ah kan hman khawh. Tangka tampi dih lo in, kan ngeih chun ti le rawl in fimnak cu awl tein kan cawng kho. Thlanglei Lairam in biaknak rianttuan le hruaitu ttha tampi kha an cawngchuak. Hi bantuk sianginn ttha hna kan ngeih caah kan miphun le a umnak Hakha khua nih rumra a ngeih chih. Ruah setmat long ah hngalh khawh ding mi pakhat cu ”miphun pakhat sinak a feh ternak” hi a si.

Chin Christian College ah rianttuantu le siangcachim hna cu kan ram dirhmun a harsa tuk caah rawl ei khim an ngei kho lo. Sianginn caah a herh mi inn sak ding cu a tam ngai rih. Bawmh an herh. Kan thlacamnak an herh tuk. Dollar fang khat tein bawmh zong ah an caah man a ngei tuk. Hi sianginn hi bawmhnak pek na duh ahcun CBC, USA ngunkeng sinah phaisa kuat khawh a si.