Chin Christian Writer’s Group

Kan thiambik mi kan nuhrin Hakha holh in Baibal Biakam Hlun le Thar dihlak fianternak kha leh dih ding in Rev. Dr. Sang Awr hruainak in Laimi Baibal thiamsang vialte tel in Chin Christian Writers’ Group hi an ser. Hi baibal fianternak long si lo in, Lai holh in cauk tampi chuah khawh ding kha an saduhthah mi a si. Hi rianttuannak nih kan holh a tthan ter lai. Lai holh thar tampi aa chap lai. Kanmah holh tein Baibal kong kha kan theih khawh lai. Lai holh in cauk tampi kan rel khawh ahcun mi tampi nih hngalhnak le fimnak in kan tthangcho lai. Kan zumhmi kha fiangtein kan hngalh khawh cang lai. Baibal hngalhnak le fimnak in kan tthan tikah cawnpiaknak hman lo nih a kan thuivor lengmang kho lai lo. Pathian kan zumhnak le minung kan thinlungput hi tiva lian bang dai tein a luang kho lai. Hngalhnak a niam tuk ahcun Pathian kan zumhnak hmanh hi tiva te bang a let lengmang. Luannak le tthannak a ngei kho tawn lo. Cu caah, kanmah holh tein ttial mi cauk tampi kan ngeih khawh nak hnga, biatak chuah a cu tuk cang.