Chin Refugee Service

Malaysia ah aa dormi kan miphun hawi Chinmi hna cu ram kip ah an phan thluahmah cang. A rauh hlan ah New Delhi, India in kan miphun hawi hna cu ram kip ah an rak phan ve hna lai. Caan saupi hmu lo in a ummi u le nau, ta le far, nu le fa, pa le fa, le chungkhat sahlawh hna he van i ton cu lung a hno, lawmhnak mithli a tla kho. Pathian khuakhanning ngai hi! Chim thiam awk a ttha lo. Thinlung le thlarau in zumh ding long a rak si ko.

Malaysia le India in ramdang ah kal khawhnak caah a kan zuampiaktu ramhruaitu hna le miphun nu le pa hna dihlak cungah lunglawmhnak tampi kan ngei. Kan miphun nih Lairam ah harnak kan tuar long si lo in, lampi India le Malaysia ah kan temtuarning le kan lohtlauning hi a fak tuk. Kum caan saupi tuar kho ding kan si lo. Ramdang ah kan kal khawh tuannak ding ah thla cam cio hna usih.

CBC, USA ram chung rianttuantu pastor te le hruaitu upa hna nih kan tuah khawh mi cu a um lo nain, thlacamnak he kan si khawh nak zawn cio in khrihfabu chung zumtu hna he ttanlak cio a si. US cozah nih an ram ah Karen le Chinmi pawl dornak nawl a kan pek lo lio ah Rev. Dr. C. Duh Kam le Word Relief, Christian Freedom International, le Jubilee Campaign rianttuantu hna nih March 07, 2006 ni ah White House ah Mr. Tim Georglein, the Special Assistant to President, kha an va ton. Chinmi hna kong kha chim caan a ngei. Ramdang minung le khrihfa bawmtu hna le kan ram hruaitu le upa dihlak hna rianttuannak le Chinmi zumtu hna thlacamnak cu Pathian nih thluachuah a pek. USA ah kan miphun nih dornak nawl a hmuh caah duhsah tete in an ra pah lengmang cang. Kan umnak khua cio ah a rak phanmi miphun hawi hna caah khrihfabu, pastor le hruaitu hna nih bawmh khawhnak lam kha hawl cio a si.

Refugee caah American Baptist Churches, USA cu Church World Service he rianttuan tti zungzal mi a si. Kuam ah kan um lio in a kan bawm peng mi a si. A tu zong ah Karen le Chin miphun tampi a phan ding kan um caah an si khawh ve nak zawn in bawmhnak lam cu an hawl lio. Asian American Baptist Leaders Summit cu Valley Forge, PA ah February 26-28, 2007 ni an tuah. Rev. Dr. Chum Awi le Rev. Dr. Duh Kam an kai ve. Chin Refugee kong kha an chimh hna. ABC USA nih Burmese Refugee Task Force komiti a siam i refugee kong caihnak meeting cu May 14, 2007 ni ah tuah a si tthan. Rev. Dr. Thlaawr Bawihrin le Rev. Dr. C. Duh Kam an kai kho ve. Karen pawl hi thawng tamtuk a ra ding an si caah Thailand ah a um mi Karen sinah missionary a ttuanmi Rev. Duane Binkley le a nupi kha Karen pawl bawm ding in USA ah an chiah hna. Karen caah rian an ttuan pah in Chin refugee hna nih bawmhnak kan herhnak kong cu mi dang sinah an thanh pah ve.

Malaysia ah aa dormi Chinmi hna ca’h rianttuannak CHRO Refugee Service Project ahhin ramdang khrifabu tampi nih bawmhnak tuah cio a si. Ramkip le khuakip in Laimi (Chinmi) zumtu hna nih pek mi Pathian chaw hna cu hmun khat te ah harnak a tuarmi miphun hawi hna caah rian an ttuantti. Jesuh Khrih nih “Ka unau pakhat khat cungah, zeitluk hmanh in sifak le nauta si sehlaw, nan tuahmi thil paoh hi ka cung i nan tuah a si ko (Matthai 25:40,” tiah a ti bantuk in harnak a tuarmi miphun hawi hna caah bawmhnak kan tuah mi hna hi Khrih caah rian kan ttuan a rak si.

Kannih Chinmi cu ramdang kan phak cangka tein khrihfabu in kan dir caah Pathian ram caah rianttuan hram kan thok tuan kho. Ramdang Chin khrihfabu lakah upabik cu kum sarih long a si rih. Kal a hrawt ka mi khrihfabu hna nih Lairam ah rian kan ttuan mi a tam ngai cang. Kan cawlcanghning hi American Baptist Churches, USA hna nih a hmuh tikah zohchunh awk tlak ngai in an kan ruah. Khrihfabu in kan dir hna caah zumtu dihlak ttang rual in kan sinah a ra mi miphun hawi hna bawmhnak zong kan tuah khawh deuh. Rianttuantu pastor le khrihfabu hruaitu hna zong pakhat le pakhat thawng kan i hal, kan i thanh. Khrihfabu cio in thazang kan chuah cio, ttha ngai in bawmhnak kan tuah khawh hna lo hmanh ah, a phan thar mi caah tlam a tling deuh ngai. Zumtu pumpak cio nih kan ngeih mi bawmh duhnak thinlung nih tamtuk rian a ttuan cang. Ramdang khuasa Chinmi hna le khrihfabu chungtel hna cu retheih hram kan thok ka te long a si rih. Kum tam ngai retheih hau zong kan si kho. Sihmanhseh, kan miphun hawi hna he Pathian ram le Lairam le miphun sernak caah hmailei ah kan dir tti ding mi kong ruah ah thazang a um tthan lengmang. Pathian bia in kan miphun hi dinnak a ttanh mi miphun ah ser i zuam hna usih.

Pathian bia cu Profet Isaiah sin ah “Tho tuah, Jerusalem, ni bantuk in tlang tuah; Bawipa sunparnak cu na cungah a tlang (Isaiah 60:1)” tiin a lang. Hi bia hi Babilon saltannak in a rak kir i zalawnnak a hmu mi Jerusalem khua ah a um mi Judahmi sinah chimmi bia a si. Babilon in a kir rih lo mi an um rih. Jerusalem kha tho law ni bang tlang tuah, tiah a ti tikah Jerusalem khua kha si lo in zalawnnak a hmu mi hna kha a chim duh mi a si. Kannih Laimi (Chinmi) caah Lairam ah a ummi hna cu Judah saltang bantuk an si. Lam tanttim ah khua a sa mi hna cu “Na fapa hna cu lamhla piin an ra lai i na fanu hna cu ngakchia bantuk in puak cung in an rak lai (Isaiah 60:4)” timi saltannak in a kir ding mi pawl an si. Judah saltang a hluan mi hna le lam tanttim ah a um mi hna kha ‘Tho tuah, ni bantuk in tlang tuah’ ti awk an ttha lo. Ramdang a phan i zalawng tein khua a sa mi Laimi (Chinmi) hna hi Bawipa sunparnak nih ni bang a tlaan hnawh mi kan si. Tho in Pathian ram caah rianttuan ding kan si; kan miphun caah rianttuan ding kan si. Pathian nih kan miphun thluachuah pe ko seh!