Hla le Ringawn

Mah miphun holh a feh ter tu cu hla hi a si. Laimi nih miphun dang hna hla kan sak duhnak a ruang cu hla ttha kan ngeih lo caah a si. Cu hlan ahcun Kawl hla le Mirang hla ttha long ngaih awk kan ngei. A tu cu tthangthar mino nih Lai holh in hla tthattha an kan phuahpiak cang i kan mino hna nih hlasak awk an ngei cang. Lai holh an thiam deuh. Lai holh in hlasak a nuamh an theih cang. Hlaphuah thiam le hlasak thiam mi hna hi Lai holh a fehtertu nan si. Kawl hla le Mirang hla tluk ttha le nak ttha in ringawn awdawh he hla tampi nan kan phuahpiak le sakpiak khawh ahcun Laiholh cu a nung zungzal ko lai. Hla hi holh tthannak le karhternak caah a rang bik mi hriamnam a si.

Pathian hla cu hlaphuahtu nih a theology kha hla le aw in a tuah mi a si. Ram hla cu hlaphuahtu nih miphun a dawtnak kha bia le aw in a langhternak a si. Zuun hla a phuahtu nih leng le val dawtnak thinlung kha bia le aw in a phuan. Hi vialte hi minung nunnak he ni fa tin a pehtlai mi le tem khawh mi long te an si. Hla nih cun mi thinlung kha awl tein a thlen khawh. Cu caah, hla ttha tampi kan ngeih a hau.

“Khrihfa biaknak hmanh hi hla in sak mi biaknak a si” caah vawlei khua za kip ah awl tein a karhnak a si men lai. Pathian hla nih mi thinlung kha a suk tikah kan thlarau kha a tthangh. Zumhnak cu a tthan ter. Hla cu thawngttha chimtu sermon tluk in a tthawngmi sermon a si ve.