Life of Church

Emil Brunner nih “Mei cu alhnak in a nun bantuk in khrihfabu cu mission in a nung,” tiah a ti. Mission rian a ttuan lo mi khrihfabu cu a ngawr-zeng mi khrihfabu ah a cang tawn. Hnahteno a corh tthan kho ti lo mi thing pitar bantuk a si. Dawhnak a ngei lo. Nain, Pathian thawngttha chim a duh mi khrihfabu le zumtu hna thinlung cu lawmhnak in an khat. Ruahchannak le thanuamnak he vawlei an nun caan an hmang. Vailamtah hram ah kan phak pi mi thlarau hna cu van sui khualipi dawh kan phak tikah kan suiluchin dawhtertu an si te lai ti kha an hngalh. An pek tam paoh ah an i lawm. “Pek lei ah hin hmuh lei nak in lunglawmhnak a um deuh” tiah Khrih nih a chim mi bia cu an caah rawl thaw tak ah a cang. Pek lo in an um kho lo. Thluachuah petu Pathian hmai kha an zah zungzal. Thluachuah an don mi vialte ruat tthan in, ”Maw Khuazing aw” tiin lawmhnak an chim tthan tawn.

Semnak Lairam ah CBC, USA nih maw, kan khrihfabu nih maw, mission rian a ttuan tiah ruat sual hlah u. Nangmah ttuan mi a si deuh ti tu kha hngalh i zuam. Zumtu dihlak nih kan thawh mi dollar tlawmte cu Lairam ah rian an ttuantti hna. Kan hngalh lo in, Pathian sinin kan don mi thluachuah hna cu an tlawngleng tti. Pathian thawngttha an aupi. Hi ruang ah, hngalh fian ahcun zumtu hna hi i dawt lo awk kan rak ttha lo. Ruah setmat ahcun Bawipa lo chungah kan kutneh tel ve hrimhrim kan duh lai. Bawi Khrih thawngttha chimnak caah cun kan zeipaoh kan sian ko hnga. Kan miphun hawi hna hi pumsa ti le rawl long in an rawl a ttaam lo. Thlarau in an rawl a ttaam, an ti a hal. Hi lio ah Pathian bia cu “Ahodah ka fial lai? Ahodah ka lamkal a si lai? (Is. 6:8) ti hi a si. Nangmah na kal lo ah ahodah a kal kun lai?

Khrihfabu a nunnak cu Pathian thawngttha hi a si. Minung bia in a nung lo. Khrihfabu chungah Pathian bianak in minung bia kan theih deuh ahcun kan khrihfabu cu a thi ko lai. Pathian ttihzahnak le zumhnak thinlung hi khrihfabu nunnak cu a si. Pathian Thlarau hi zumtu hna kan tthawnnak a si. Khrihfabu nih mission rianttuannak kong cu a ruah lai. Nain, cu mission rian cu Khrihfabu chung zumtu hna nunnak ah a can a hau. Pathian zumhnak thinlung le Thawngttha in nun kha kan herh. Minung khuakhannak vial in mission rian cu ttuan khawh a si ve ko. Nain, khrihfabu nih hlawk hnga ding tluk in aa hlawkpi kho lo. Pathian sinin thlarau thazang lak kan hau zungzal. Pathian bia hi kan mission rian nuntertu zungzal a si a hau.