Literature

CACC GS hlun Rev. Dr. Hla Aung nih Thlang Lairam in Laica chimtu saya an herhnak kong kha a kan thanh cang. Nan theih cio ttheu lai. Thawngttha chimnak ah ca le holh hi thiam lo ahcun Bible hi an rel kho lo i khrihfabu le khrihfa sinak zong a tthang kho lo. Cu caah, mission rian a ttuanmi siangbawi te nih ca a kan tuahpiak, a kan chimhnak a si. Bible ttha tein rel khawh hi a biapi bik. Thlang Laimi nih Kawlca le holh cu an thiam nain, Kawl cu khrihfa an tlawm caah Bible bia le hla cu an holh in an ttial tam kho lai lo. Hrilhfiah te hna zong an ttial kho lai lo. Kannih Laimi cu khrihfa kan sinak kum 100 leng a kai ve cang. Laiholh le ca in Bible hrilhfiah cu Lai Khrihfa Cattialtu Phu (LKCP) nih an ttial lio pi a si. CBCUSA nih kum fa tein phaisa kan bawmh hna. Thlang Lairam kan miphun hawi hna nih Laica an rel khawh ahcun Lai Bible le Hrilhfiah tiang in an ngeih khawh ve lai. Laica ttial le rel cu an thiam hrimhrim ding a si. Hranhram lo in fial phung a si lo nain, an duh ve ahcun chimh khawh ve ding in kan i zuam a hau ve. Kanpalet ah CACC hruainak in Boarding school cu kan sak cang. CBCUSA nih Laica cawnnak caah budget cu kan suai ve. Nain, hmun khat ca lawng ah a si. Hmun tampi ah an herh cang. Thawngttha chim pah in kan tuah khawhmi rian awl te a si ko.

A tu ah Rev. Dr. Lal Uk nih CACC GS rian cu April 2012 chuahka in a thok cang. Duhnak le zuamnak a ngei tukmi mino a si. Biatak chuah aa tim. Kan rianttuannak cu hma a kal chin lengmang lai. Laica tthanchonak a herh kan ti lio ah Laimi nih Education in tthanchonak an ngeih ding kha a biapi tuk. Lairam ah cachimtu saya cu Kawl lawng te an si cang. Laimi cathiam vialte nih Lairam kan hngah lo caah sianginn vialte hi Kawl ta ah a cang lai ti phan a um ngai. Lairam in mifim cathiam tampi an chuahnak ding tu ah ttan kan hau hna. A tu ahcun Bible sianginn lawng ah scholarship program kan tuah khawh. High School le University a kaimi ca zong ah tuah kan herh rih. Chin Christian College hi Chin Christian University tiang a si khawh ding in kan i zuam a hau. Cu ti cun, Lairam nih cathiam tampi a ngeih khawh lai.

A tu bantuk in hmun khat ah rian kan ttuan tti ahcun Chin Christian College, Hakha le Union Theological College, Matupi zong hi ttha deuh ngai in kan bawmh khawh hna lai. Biaknak le vawlei fimthiamnak ngei mi hruaitu ttha tampi an chuak kho te lai.