Ramdang Ah Laica Cawnnak

Chinmi hna nih kan holh le ca a tthanchonak caah ramdang zong ah khrihfabu kip nih tthal caan paoh ah Laica cawnnak cu tuah cio a si. Kan fa le nih Laica ttial le rel hi an thiam ngai cang. Sunday School zong Laiholh in chimh an si. Lai Bible kha kan hman. July 1-2, 2006 i Battle Creek, Michigan khua ah Chin Baptist Churches, USA civui tuah lio ah ngakcia Bible rel zuamnak cu tuah a si i Lai Bible hi dal khat ning in, cang 50 ti tluk hi i zoh lo tein a rel kho mi an tam ngai. Hi bantuk in biaknak lei nih Laica le holh kha tha a pek caah, an holh le awchuah zong an ttha deuh ngai cang.

Ramdang a phan mi Laimi hi India, Kawlram le Malaysia in a ra mi kan si. Kan i dor chungnak khua le ram kan um chungah kan fa le nih Lai awcawi hi an thlau pah. Kawl awcawi le Mizo awcawi dengmang in Lai biafang khek lo in an holh. A tu cu kan umnak ram holh Mirang holh kha an i lak colh. Mirang holh kha hman an i tiim ngai nain, biaknak hmun ah Laiholh tein Pathian kan thangtthat caah Lai holh hi an thiam chih.

Miphun tlau kan i thok nak cu holh hi a si. Kan fa le nih kan holh an thiam lo ahcun Laimi dang kha an kom kho hna lai lo. Miphun dang an komh cang hna lai. Holh long si lo in a hnu deuh ah Laimi thinlung an thlau lai. Miphun dang lakah an tlau lai. Ram dang ah Laica cawn cu kan herh zungzal. Laimi si ttung i Lai biafang khek tein kan fa le kan holh ter hna lo ahcun an lung a fim tikah nu le pa hmanh kha mawhphurh a kan duh kho men te lai.