ICBM Revival Groups hna cawlcanghnak kan theih i kan i lawm. Rev. Philip Hrengling le DC revival group minung 11 nih Lai Baptist Church, Buffalo, New York an tlawn i Niagara Falls (vawlei cung minthang bik tisor) ah an lennak zong Facebook in thawngthanhnak a kan tuah. Kan i lawm taktak. Revival Groups dang zong nih thawngthanhnak a kan tuah cio te lai.
ICBM Thawngtha chimnak caah 2013 kum caah minung pakhat ah $25 khan in thawh ding timi hi mi cheu caah cun a si kho lai lo ti a awl te ko lai. Hi hi cu Pathian zumhnak in thawh ding mi a si. Lairam i CCOC rianttuan lio ah nuhmei hmanh nih ar te le vok te an ngeih chun zong an rak thawh tawn. ICBM cu CCOC rianttuannak kha a pehmi a si. A dirpi. Leikhuaza Chin khrihfabu vialte he hmun khat ah rianttuan khawhnak ding caah International Chin Baptist Mission tiah min kan bunhnak a si. Thlarau a tlaumi miphun hawi hna nih titsa le thlarau in khamhnak an hmuh khawh nak ding caah a si.
Khrihfa biaknak cu mission riantuannak lawng nih a thancho ter khawh. Zumhnak kan timi hi mit hmuh in a alh khawhnak cu mission rian ahhin a si. A tu in hmuh chung ding mi cu Paletwa le Kanpalet le Mindat le Kankaw peng nih kan miphun hawi hna le mino hna nih hlaremh ttha ttha he Pathian thangthat in civui hna an tuah khawh caan a um te lai. An inn lo a ttha deuh lai. Kan hrinsormi thlarau fa le hna kan hmuh tikah lunglawmhnak cu a sang khun lai. Hi hi Bawi Khrih ah kan ruahchannak a si. Kan phak hlan in kan i lawmhciami an si. Mission rian kan ttuannak thazaang le khrihfabu kip kan thlarau thazaang a si lai.
Laimi kan tlawm chinchap ah Thlang Laimi hna hi Khrihfa an si lo ahcun Laimi sinak hi an i hrawm kho taktak lai lo. Kawlram Buddhism hi a tthawng tuk. Hi Buddhism ruangah Kawlmi hi cattial le carel kho an tam. 1825 i Mirang nih Kawlram an doh lio ah carel kho mi Kawl cu Mirang nak in an rak tam deuh. An biaknak Buddhism ruangah a si. An biaknak hi an miphun nunnak ah an hman khawh taktak.
Kannih Laimi nih Khrihfa biaknak hi kan miphun nunnak ah kan hman ve. Kan zumhnak hrampi cu “Pathian Fapa Jesuh Khrih an zumh lo ahcun an thlarau cu a tlau lan lai” ti hi a si. Cu caah ICBM rianttuannak cu kan thok chan a si.
Pathian nih thluachuah in pe cio ko hna seh.
CBCUSA EM
