Pathian ram kauhnak caah le kan miphun sernak caah rian kan ttuan tikah Pathian nih A kan pekmi sikhawhnak zawn cio in rian kan ttuan. Pathian ram a kauh khawh nak ding, kan caah a ttha ding in kan ruahmi hna, le kan miphun caah saduhthah mi hna cu kan ttuan cio hna. CBCUSA cu Laitlai Chin Khrihfabu hna hmun khat ah Pathian rian kan ttuanttinak a si. Falam le Tedim le Lai hawi dang zong nih biatak chuah in an ttuan cio hna. Zumtu kan si hna caah hnahchuahnak thinlung um lo in, dawtnak thinlung in pakhat le pakhat thla kan i campiak ding a si. Kannih Laitlai Chin khrihfabu hna zong nih hawi kan tluk khawh ve nak hnga kan i zuam ve a hau. Hi bantuk in kan ttuan cio lawng ah kan miphun le ram cu a thangcho lai.
Laimi cu bawmh herhmi lawngte kan si caah CBCUSA nih komh mission riantuannak caah 6% tein pehtlaihnak kan tuahmi phaisa cu hmun kip ah kan phawt zamh hna. Tlawmte cio in dawtnak kan langhter. Leikhuaza Laitlai Chin Churches hna nih thazaang kan chuah tti khawh tikah cun tampi kan ttuan khawh te lai.
CBCUSA nih a ttuanmi hna:
Semnak Lairam ah:
(1) Chin Christian College bawmhnak a tuah. Siangngakchia caah scholarship le saya te laksawng a pek hna. CCC cu kan ngeih chun college a si. Chin Christian University si kho ding in saduhthahnak kan ngei cio hna. Bible lawng si lo in, Art and Science subject pali hrawng tal chimh khawhnak University si kho sehlaw a ttha tuk hnga. Pathian nih tlamtlin ter hram seh. An inn hi hmanthlak zoh bang an si lo. An chia ngai hna.
(2) CACC he rian an ttuan tti. Kanpalet ah Boarding School an tuah tti. Boarding inn cu CBCUSA le Melbourn Chin Church, Australia nih an sak. Sianghngakchia 30 an cawmken hna. Saya Van Nawl Thang (B.Sc, BD Serampur) nih a zohkhenh hna. Hi bantuk in rianttuan hi tu chan ahcun an duh bik.
CACC Zunginn thar saknak ca tlakrawh chiahnak
An office cu pumpak inn pakhat te khi a si. A tthing cang. A rawk ngai cang. Rianttuannak hmun an ngei lo. CACC zung inn cu dawh tuk in sak a hau. Hi inn sak nak caah Laitlai dihlak nih rian kan ngei.
Lairam hi Laica, Laiholh le Lai Nunphung in ttha tein tthanpi khawh lawng ah kan miphun hi aa hmun lai. Thlang Lairam ah Thawngttha chim rian kan tuan lio ah Chak Lairam ah kan ttuan tawnmi nak tam in rianttuan kan hau fawn. CACC he thuk le kau deuh in rianttuan tti kan hau. A nung tti mi si kan hau.
Pum khat bantuk si kan hau. Tthanning aa rual a hau. Biaknak cauk rel ding tampi ttial le chuah kan hau hna. Lai Bible le Lai Hlabu hna kan chambau tuk rih. Leikhuaza Laitlai Khrihfabu dihlak ih kan rian a si.
(3) Agape Clinic, Hakha cu Hakha Baptist Church, Chin Baptist Mission Church, DC le CBCUSA nih an i bawm i Medical Mission cu an ttuan. Sifak santlai lo tampi nih man awl tein sibawi an panh kho. Hi Agape Clinic cu Bawi Khrih nih ka unau tiin a kawhmi sifak santlai lo tete hna nih pumsa damnak an hmuhnak sikhaan a si. Hi Clinic hi CBMC nih $97,000 dih in a sak. Room pahnih lawng kha an hman khawh. Inn cu hman lo in a paam ngai. Riantuannak hmunhma a um ko in ruat usih.
4) Bethel Clinic, Thantlang cu Thantlang Baptist Church, Battle Creek Chin Baptist Church, Michigan le CBCUSA hna i bawm in tuahmi sikhaan a si. Battle Creek Chin Baptist Church nih a inn hi an sak. Sifak santlai caah thathnemnak tampi a ngei. Mi tampi nih damnak an hmu.
(5) Hakha General Hospital ah Chapel dawh ngaimi kan sak. Health Care Volunteer Groups nih an tawlrel. Hi chapel ah mithi ruak an suan. Damlo le an chungkhar hna nih hi hmun ah thla an cam kho.
(6) Hakha – Hmandaw Lamcawhnak: 2007 kum in $2000/year in lam cawh a dih tiang a bawmh.
(7) Falam i Lailun Agricultural Research cu $1000/year in a bawmh.
(8) Sang Awi Printing Ministry, Hakha kha Printing Machine cawknak caah bawmhnak a tuah. Hakha Post le cauk dangdang kha an nam hna. A tthahnem ngaingai.
(9) Siangbawi te thlan kha HBA hruainak in a thar chuah.
(10) HBA zunginn saknak le Khuahlun biakinn kang bawmhnak a tuah.
(11) Chin Funtomnak Bu [CFB]: Kalay-Kabaw-Gangaw peng chung Kawl lak ah a tlaumi Laimi hna kha kawl nak caah 2012 ah hi bu hi an dirh. Laica le Laiholh chimh an timh hna. Lai Journal Chin Times an chuah tawn. CBCUSA nih $ 1000 a bawmh. Hi hna rianttuannak hi a biapi tuk. Laimi kan tlawm tuk hlei i miphun dang lakah kan tlau ding cu kan pamhmai tuk. Kalay University ah Lai siangngakchia 2500 an um. Kalay Valley ah 54% cu Laimi an si cang tiah an chim. Kalay peng cu Lairam a si ti ding in a um cang. Lai nunphung, ca le holh nih a ngeihmi ram ah a si kho ve te lai.
Chin Baptist Association le Chin Funtomnak Bu, Kalay
CBA compound cu a kau. A ttha. Man tamtuk man a si cang. Pathian nih hmun tha tuk a kan pek caah lawmhnak a tam. An hmun hi Laimi nih hman khawh tlak in a kau.
Chin Funtomnak Bu hi Kawlrawn ah a tlaumi Laimi hna an hawl hna.
Kalay, Kabaw le Kankaw peng chung um Kawl lak ah a tlaumi Laimi kha an kawl hna. Laica an chimh hna lai. Chin Times khi anmah nih an chuah. Phaisa lei in an harsa ve ngai caah CBCUSA nih $1000
tein bawmhnak a tuah ve.
(12) Union Theological Collegem Matupi: 2007 kum thok in $3500.00 khan in a bawmh. Hi sianginn nih B. Th degree program an ngei. Laica cu subject pakhat in an cawn. Indiana Chin Baptist Church nih Rev. That Dun’s Memorial Library an sak piak hna. Kan siangbawi te hna ruangah Laitlai tlaihchanmi an si ve. Kan bawmh khawh paoh ah Thlang Lairam rianttuannak caah a ttha lai.
(13) Matupi khua ah Hakha Post rel a duhmi hna caah copy tuahnak seh kha a cawkpiak. A tu cu Hakha Post cu Matupi khua ah an rel khawh cang. Upa deuh paoh nih Laica le holh cu an thiam dih.
(14) Lai Bible Hrilhfiah ttialnak: A ttialtu Lai Khrihfa Cattialtu Phu kha $6000/year in 2007 kum in bawmhnak a tuah. Uk 5 an chuah cang.
(15) Kanpalet ngaktah cawmnak kha 2007 kum in $2000/year in a bawmh. ZBC nih a rak bawmhmi an si. Kan bawmh ve hna. High School a dihmi an um cang.
(16) Paletwa khua ah ngaktah inn kha $16,000 in a sak.
(17) Malaysia Chin Prison Ministry: Chin nu le ngakchia thongtla mi hna kha $ 5000/year in bawmhnak a tuah hna. CCF, Malaysia he an ttuan tti. CBCUSA nubu nih phaisa ttuanvo an lak i tam chin lengmang an ttuan khawh cang.
(18) Chin Students Organization (CSO), Malaysia hna kha $5000/year in bawmhnak a tuah. Zalzaam ngakchia tampi nih fimnak an cawng kho. Ramdang an phak tikah English an thiam pah caah cacawn an i foih deuh.
(19) Lai Baptist Church, Mandalay nih sak lio mi Lai Centre saknak caah a bawmh. Health Ministry zong $5000/yr in a bawmh. Hi rianttuannak nih Thlang Laimi cheu khat le Chak Laimi cheu khat hna kha thathnemnak tampi a pek hna. LBC hi member 100 hrawng an si. Kanpalet, Mindat, Kankaw, Matupi, Zotung le Chak Lairam in a rami damlo hna bawmhnak caah an vunhawng nih a zo lo. Cu caah CBCUSA nih bawmhnak cu a tuah ve. Health Ministry cu a ttuan pi. Pumpak khrihfabu hna le ram dang in bawmhnak nan tuah cio caah a ttha tuk.
Lai Center, Mandalay
Dot thum tiang tlakrawh an rual. Dot linak an kai kho ti lo. A tang dot hi hman khawh ding in siam hmasa a hau an ti. Mizaw le damlo hna caah hmun an herh tuan. Rianttuan ding nih a hnawh cuahmah hna. Nan bawmhnak cung ah an i lawm tuk. Pipuam ngai in tungtlang an tuah. A ropui ngai ding a si. Hi hmun hrawng vawlei cu Tuluk pawl nih an ngeih thlu cang. Laimi nih hi hmun kan ngeih cu kan van a ttha hringhran.
(20) Lairam Jesus Christ Baptist Church (LJCBC), Lawntlai, he Bawmram i Miri mi hna sin ah rianttuan an i tiim. Civui an i hrawm kho cang. Laica le Laiholh thanchonak caah thazaang an chuah tti hna.
(21) MIT, Yangon building saknak caah $15,000 a bawmh.
(22) CBCUSA Relief Fund: USA ah thihnak ton tik i bawmhnak caah Relief Fund a tuah i Khrihfabu pakhat le pakhat an i bawm. CBCUSA ah aa telmi khrihfabu 65 lakah a lian deuh mah te todelh kho hi 10-15 lawng kan si. Khrihfabu 50 cu bawmhnak a herh dihmi kan si. Hi bantuk bawmhchanhnak Relief Fund nih hna a kan ngam ter.
(22) USA ram chung ah khrihfabu tlawnnak le gospel crusade hna a tuah. Mission rian a ttuanmi khrihfabu hna hi Pathian bia in kan i thanghtthan a herh ve. Kanmah lak ah zumlotu an tamtuk rih. Hrintthan lo mi an tam. Zu le sa nih thah an kan timh. Thawngttha Bia cu chimh le cawnpiak kan hau taktak hna.
(23) International Chin Baptist Mission [ICBM] cu July 13, 2013 ni ah Chin Evangelical Baptist Church, Indy ah onnak tuah in thok a si. Thlarau tlaumi Thlang Lairam le Kankaw area ah a ummi hna kha Khrih zultu, thlarau le pumsa in khamhnak a hmumi an si dih nak ding caah a si. Hi rianttuannak nih Falam le Tedim khrihfabu hna zong a sawm hna. A tu tiangah a kan telpi kho rih lo. Thlarau nih A kan hruai lai i Khrih Thawngthan cu kan aupi khawh ko lai tiah Pathian kan bochan. Hi rianttuannak nih aa tinhmi cu Thawngtha chim a si.
Harnak Tuarmi Hna Bawmhnak
(1) Lairam Mangttaam (2008) kha bawmhnak a tuah. Lairam dihlak ah zu nih thlai cinmi a ei dih caah ttaamnak fakpi in a tlung. Laitlai Chin khrihfabu hna nih Lairam dihlak ah bawmhnak kan tuah. Kan rianttuanbu nih Chin miphun dihlak caah a ttuan.
(2) Lairam Innkaang (2010) kha bawmhnak a tuah. Lairam le Kawlrawn Laimi inn 136 a kang. Hi vialte hi bawmhnak kan tuah hna. An rak i lawm ngai cio.
(3) Saikhumphai mi harsa hna bawmhnak (2013) cu $3000 in a tuah. A kal cuahmahmi program a si.
(4) Kawlrawn ah Nargis thlichia in harnak a tuarmi kha a bawmh hna.
(5) Giri thlichia tuar Asho Chin mi hna kha bawmhnak a tuah hna.
(6) Kawlram chungah harsatnak a tuarmi Kachin hna kha $50,000 in bawmhnak a tuah. Kachin upa hna nih Chin cu kan u le nan si tiah Hakha ah darkhuang he an rak kan hlam. Sia kawng in Chin miphun nih an don ve hna. Chin cu upa, Kachin cu ngakchia deuh tiin tuanbia chim tawnmi cu a si.
(7) ABCUSA sin in, USA thlichia tuar le Haiti le Japan lihninh harnak tuarmi le Asia ram Sunami ruangah thihnak a tuarmi hna cu a bawmh tawn hna.
