Kum 84 a simi Lairam Chin Baptist khrihfabu hna cu 1983 kum in ramthar rianttuannak in aa hrimtthan. Hi ramthar rianttuannak cu CCOC tiah min pek a si. Lairam ah Khrih Thawngttha a phaknak 1899 kum in kum zakhat tlinnak 1999 chung ah Laimi vialte cu Khrih zultu kan si lai tiin Chak Lairam in Thlang Lairam ah Zomi Baptist Convention nih 1983 in ramchung missionaries 100 reng lo kha kum fa tein a thlah hna. Zumtu thar tampi an tlaih hna. A tanglei bantuk in:
1983 ah thlahmi palai 85 an si.
Mindat Area ah palai 20, 2. Kanpalet Area ah palai 10, 3. Paletwa Area ah palai 27, 4. Gangaw Area ah palai 10, 5. Matu/Zotung Area ah palai 6, 6. Tidim/Tonzang Area ah palai 6, 7. Tamu/Kuki/Homalin ah palai 6 cu thlah an si.
Kum khatnak a dih tikah Falam khua ah February zarh donghnak 1984 ah civui tonnak an tuah i zumtu thar 2585 nih Khrih zumtu thar ah an cang.
1984-85 kum 2nk ah palai 102 an thalh hna. Zumtu thar 1502 an hmuh than.
1985-86 kum 3nk ah palai 177 an thlah hna. Zumtu thar 2,368 an hmuh hna.
1986-87 kum 4nk ah palai 85 an thlah hna. Zumtu thar 768 hmuh an si.
1987-88 kum 5nk ah palai 87 an thlah hna.
1988-89 kum 6nk ah palai 84 an thlah hna.
Ram buai lio a si caah tinhning bantuk in Thawngttha chim khawh a si lo. Thawngttha chimtu hna kha ZBC nih a kawh dih hna. Hi kum chung ah aa pumpe mi palai hna chung in Lg. Ngai Za Siam, 19 cu missionaries a thlahtu hna tthanghphawknak caah Thantlang peng chungah Thawngttha an chim lio ah May 24, 1988 ni ah a thi i Thantlang ah a ruak an vui. Nunnak pek in Khrih Thawngttha aaupi dang zong an um. Cu ti cun, Lairam ah Khrih Thawngtha cu tlang cung mei bang a alh tthan.
1989 -1991 kum chung ah ramthar ah thlah mi an um pin ah Chak Lairam khrihfabu hna kha thlarau in an i tthanghnak ding caah palai tampi an thlah hna.
1992 – 93 kum chung ah zumtu thar 2500 nih Khrih cu an Bawipa ah an pom khawh. Ramthar in a tthangmi siangngakchia hna kha Bible sianginn an kai ter hna.
1993 ahhin Thawngttha chim awk a ttha lo. Ramthar minung nih missionaries zong kha an cohlang hna lo. Cu caah, ramthar minung tu kha training an pek hna i anmah lak ah Thawngttha an chim ter hna. Hmun tam deuh ah mission rianttuannak an on tthan. Rakhine le Yaw penghna ah missionaries an thlah hna.
1995 kum ah zumtu thar 337 an hmuh tthan hna. 1983 kum in mission rianttuannak an thok in ahnubik kum tiangah Buddhists 650 kha Khrihfa ah an cang. Zumtu thar a tambik cu zumlotu [animists] hna kha an si.
Cozah nih Khrihfa hna rianttuannak kha a donh tuk caah hlunghlai ngai in kum za puai cu tuah khawh a si lo. Nain, Lai khrihfa mi hna lungthin a thakza tuk caah khuate kip tiang in an tuah cio hna. Cu ti cun Pathian ram cu Lairam ah a kau chin lengmang.
2000 kum in cun CCOC rianttuannak cu baan a si. Khrih Thawngttha he miphunpi cawlcanghnak cu aa din. Zumtu hna kan thlarau zong aa din ve. Mi tampi nih CCOC rianttuannak aa dinh cu Laimi nih kan sunghbiknak a si tiah an ruah cio. Cu caah, hi rianttuannak hi a thar in Thawngttha mei kau tthan ding ah duhnak a tam ngai cang. CBCUSA nih leikhuaza Laitlai Chin khrihfabu dihlak he Thlang Lairam ah Khrih Thawngttha chim khawh nak ding lam cu 2012 kum thar in lam a dap thok tthan. Thlang Lairam ah 2012 chung ah biakinn 10 sak ding in timhlamhnak a ngei. ICBM program thok ding in ruah a si caah lian deuh in timhtuah a si.
Thlarau a tlaumi khamhnak rian cu zumtu nangmah le keimah rian a si!
