Avoi 1nak CE Teachers Conference

CBCUSA cu 2004 in rak thawk a si. Cu hlan ah local church pawl arak um len cang. Cu local church pawl ah mahle khrihfabu cio ah Christian Education (CE) zong a um cang. CE cu Sunday school tiin auh deuh a si i, a ministry tu cu CE tiin auh a si. Cu Sunday school ngakchia chimtu dingah cawnpiaktu fial an si. A cheu cu siaherhnak he aa volunteer mi zong an um.

Sunday School cawnpiaktu hna cu mahle khrihfabu ah cawnpiaknak training a ngei kho an um i, a ngei kho lo zong an um ve. Ngakchia cawnpiaktu pakhat nih hmual ngei deuh in a cawnpiak khawh hna nakhnga, training pek le kai cu a herh taktak mi rian a si.

Cu caah CBCUSA CE Department nih CE teachers pawl caah local church in siseh, area le hmunhma hoih in training tuah dingah aa hmaithlak. Tu kum 2023 chung ah Area pali ah training kan tuah kho. Training lawng si loin CBCUSA ramchung dihlak caah CE Teachers Conference cu October 27-28, 2023, Charlotte, NC ah hlunghlai ngai in kan tuah kho.

Hi a voikhatnak CE Teachers Conference ah hin khrihfabu 60 in saya/sayama 250 an kai kho. Zan ah pumhnak voi hnih kan tuah. Khrihfabu tampi i fonh in Bawipa thangṭhat cu pumh a nuam ngai. October 28, 2023 ah chun nitlak cawnnak kan ngei. Cawnpiaktu ah Pastor Henry Cunglian Uk le Dr. Thian Nun Piang an si. Pastorte he CE teachers te he thanuam ngai in chun nitlak cawnnak le hawikomhnak kan ngei kho.

Conference a kai mi hna evaluation halnak kan tuah i, an hmuhton mi le cawn mi vialte zoh tikah an feed-back tam deuh cu 90% cunglei a si. Hi bantuk conference hi kum khat voikhat maw nan duh, kum khat voi hnih tiah biahalnak kan tuah i tam deuh nih kum khat voikhat tuah dingah an duh. Cu nih a langhter mi cu an pumpak caah ṭhathnemnak tampi a um ko ti a lang. Mahle local church cio ca zong ah ṭhathnemnak tampi a chuahpi lai kan zumh.

Kan Conference tlangtar cu “Equipping the saints for service” (Efesa 4:11-12). “Pathian rian ṭuan awkah timh” ti a si. Hruaitu ṭha le a fek mi hruaitu ser khawhnak dingah training tuah lengmang kan herh. Training tuah le kai cu i hruaining le cawnpiakning ah i update nak a si. Cu update nak nih mi a hruai kho i, a sersiam kho deuh. Training le zapi fonh in conference ngeih cu sau nguhnak le ṭhanchonak a si tiah kan hmuh caah pehzulh peng ding in kan saduhthah a si…