Van in vawlei ah thlahmi thothan Jesuh Khrih nih tuan lo awk tha lo in A kan fial caah kan tuan. Cucaah khuazakip ah va kal u law miphun vialte kha ka zultu ah va ser hna u; Pa le Fapa le Thiang Thlarau min in tipilnak va pe hna u law, * kan fialmi vialte hna hi an zulh nakhnga va cawnpiak hna u. Cun hihi philh hlah u: nan sinah a zungzal in, caan dongh tiangin ka um lai,” tiah a ti hna [Matthai 29:19-20]. 

Khrihfabu cu Khrih mission rian tuan ding ah ser a si.  Pathian nih Khrih cu kan sin ah a thlah.  Thothan Jesuh Khrih nih Thlarau Thiang cu kan sin ah a thlah.  Pa le Fapa le Thlarau Thiang cu kan sin ah rian an tuan.  Lamkaltu 2:42-47:Lamkaltu hna cawnpiaknak ngaih awkah khan atu le atu an i pum i hawikomhnak ah khan an i tel i hawikomhnak rawl an dum ṭi i thla an cam ṭi lengmang. Lamkaltu hna kha Pathian nih khuaruahharnak le hmelchunhnak tampi a tuahter hna i cu nih cun mizapi kha ṭihnak in a khahter hna. A zummi vialte hna cu i kom ṭhipṭhep tein khua an sa i an thil kha pakhat le pakhat an i hrawm. * An thil le an ngeihmi kha an zuar hna i tangka an hmuhmi kha a dihlak in an herhning cio paoh in an i phaw. Ni fate in a bute in biakinn chungah khan an i pum i an inn ah khan rawl an i hrawng cio hna i lunglawmhnak lungthin le toidornak lungthin he rawl cu an ei. Pathian kha an thangṭhat i mi vialte nih an hmaizah hna. Cun khamh a si liomi hna cu Bawipa nih ni fate in an bu chungah khan a luhter lengmang hna.

International Chin Baptist Mission [ICBM]: 

Thlang Chinram ah ICBM riantuannak cu July 13, 2013 in kan thok.  Mission riantuan cu zei dang rian he aa dang.  Riantuannak caah phaisa kan thawh tikah zapi nih cun midang caah kan thawh rua tiin kan ruah tawn.  Nain, kan khrihfabu caah le kan pumpak chungkhar caah a si zungzal.  Pathian/Fapa/Thlarau sin ah zumhnak thlaici kan tuhmi a si.  Cu caah, kan khrihfabu le chungkhar ah thluachuah cu an rak luang than. 

Chin For Christ in One Century [CCOC] mission cu 1983 in 1999 tiang Chin Baptist Convention [CBC/hlan ZBC] nih phaisa ngei lo bak in zumhnak in a rak thok.  Chin mino 7 nih an nunnak an pek.  Chak Chinram zumtu hna nih an ngeihmi paoh kan pek.  Cu tluk in phaisa a um lo bu ah hman cawk lo ti ding tluk in Chin zumtu hna nih thawhlawm an pek.  Mission riantuannak caah phaisa pek duhnak an ngeih tikah khrihfabu kip thawhlawm cheuhra cheukhat cu a rak karh tuk.  Mission tuan duhnak ngeih hnu ahcun thawhlawm cheuhra cheukhat pek i forh an hau ti lo.  Khrihfabu an thangcho dih. Cu thluachuah theipar hna cu nihin ah North America [USA & Canada], Europe le Australia & New Zealand, le Malaysia ah patlung bang a kheumi Chin khrihfabu hna hi kan si. 

Ramdang khuasa Chinmi nih kan thawhmi cheuhra cheukhat cu US dollars le Euro le Ringgit in a si.  Kan mission fields ahcun: (a) US dollar 1 cu Ks. 1347.10; (b) Euro 1 cu Ks. 1422.20; le (c) Ringgit 1 cu Ks. 301.06 ah an va cang.  Hi ti hin rian an va tuan. 

Jesuh Khrih nih minung pakhat chuncaw changreu dar 5 le nga 2 in minung pa thong 5 le nu le ngakchia kha rawl a dangh hna.  An ei bang cu sei 12 an char rih [Matt. 14:16-21, Mk. 6:35-44; Luke 9:12-17; John 6:5-14]. Khrih nih a sermi khuaruahhar thil he nihin kan mission hi kan tahthimh ahcun Pathian Fapa nih cun chuncaw pakhat kha thong 5 leeng a karh ter. Kannih caah cun US 1 dollar cu a let 1300 in a karh ve. Kan caah Pathian thluachuah hi a tam hringhran. 

Khrih nih rawltaammi pa thong 5 le nupi le fale rual cu rawl a pek hna.  Kannih nih kan miphun hawi rawltaammi hna hi bawm lo in um ko ding cu kan sia a rem cio hna lo.  Pathian nih thluachuah a kan pekmi hrawmh ve lo cu kan thlarau nih a cohlang kho lo kan ti ko lai. Mission rian kan tuan ti ruang ah phaisa tlawm te a thomi zong nih US 1 million dollars in Pathian sin ah zumhnak thlaici kan tuh kho ve. Zumtu pumpak nih US 1 dollar kan thawhmi cu thong tampi ah a cang. 

ICBM cu “CCOC Follow Up” a si. Khrih Thawngtha caah nunnak a pemi CCOC palai 7 hna aw thawng a thang than.  CCOC revival gospel team nih cun “Lairam fing le tlang vialte hi Pathian biakinn si hna sehlaw” tiin kan Chinram dihlak an rak cul dih.  Nan thlahmi ICBM missionaries hna nih an pehzulh ve.  Kan Chinram hi Khrih Thawngtha in ser kho ding ah Laitlai Chin khrihfabu 100 cuang hlumnak CBCUSA cu Pathian nih A kan pek.