Avoi 5nak Youth Conference

A voi 5nak Youth Camp cu “Biatak Cu Luatnak A Si” (Johan 8:32) timi tlangtar in Kentucky State, Hardin khua ah a ummi Jonathan Creek Conference Center ah tlamtling ngai in kan tuah. Mino 650 hrawng Pathian kan thangṭhat ṭi hna i minung 10 a hmun ah tipil-innak kan tuah piak hna. Pathian min kan thangṭhat. Cawnpiaktu ah YD president ṭhing Sya Sailo Thang le Rev. Henry Vanceu Lyan an si. Khual ngan ah kan GS, Rev. Dr. Ceu Lian Thang le CNF in Pu Thla Hei sawm an si. CNF lei kan pale tu cu a kan telpi kho lo. Thawngṭha chimtu ah Rev. Zathawngcin Siakhel, Pastor Hniar Hlun, Pastor Dawt Cia, Pastor Van Hmung Ling, Sya Cungrothang Phuting, Syma Gloria Mang Tha Par le keimah kan si. Thawngṭha chimtu hna nih Biatak an aupi i hmual a ngei. Kan tlangtaar kan khen ngai tiah ka hmuh. 

Chan thar mino tampi tutan conference ah an i tel caah kan hlawh a tling khun. Kum 4 chung rak tuah lo a si bantukin Mino tampi hi Biatak an rak ṭaamhaal tuk ti a fiang. Biaruahnak (Panel Discussion) an vuai lo. A ṭhathem tuk hna. A ṭhami biaruahnak tampi ngeih kan herh rih. Khrih ah hrambunhmi mino (Christ-centered youth) kan sinak kan aupi mi nih vawlei cung Laimi tampi ruahchannak le thlarau thazaang a pek hna. Hmailei cu ramchung mino ca lawng ah si ti loin ram kip ah a ummi Lai mino hna sin zong ah Christ-Centered Youth Ministry timi aupi ding ah kan caan a za cang ko tiah ka zumh.